لاہور: (ویب ڈیسک) بولڈ شخصیت اور صاف گوئی کے باعث شہرت رکھنے والی ماڈل و ٹی وی میزبان متھیرا ایک بار پھر سوشل میڈیا پر موضوعِ بحث ہیں، حال ہی میں فیشن شو کے دوران ان کی ریمپ واک کی ایک ویڈیو وائرل ہوئی جس کے بعد متعدد صارفین نے ان کی واک اور ظاہری خدوخال پر سخت تنقید کی۔
وائرل ویڈیو پر کچھ صارفین نے کہا کہ متھیرا پہلے زیادہ خوبصورت دکھتی تھیں جبکہ اب ان کا وزن بڑھ گیا ہے، کچھ نے ان کی واک کو غیرمعیاری قرار دیا، ایک صارف نے طنز کرتے ہوئےلکھا "اس سے اچھی واک تو میں کر لو"جبکہ چند صارفین نے نازیبا الفاظ استعمال کرتے ہوئے انہیں "ملازمہ جیسی"قرار دیا۔
مسلسل تنقید کے بعد متھیرا نے سوشل میڈیا کے ذریعے اپنا مؤقف پیش کرتے ہوئے کہا کہ افسوس ہے کہ لوگ ان کے بارے میں منفی باتیں بنا رہے ہیں، حالانکہ وہ صرف اپنی صحت پر توجہ دیتے ہوئے خوش رہنے کی کوشش کر رہی ہیں۔
متھیرا کے مطابق انہیں شو میں بطور ماڈل مدعو کیا گیا تھا اور انہوں نے کوئی غلط کام نہیں کیا تاہم بیمار ذہنیت رکھنے والے پیجز ان کے خلاف بے بنیاد باتیں پھیلا رہے ہیں۔
متھیرا نے بتایا کہ ان کا گھٹنے کا آپریشن ہوا ہے اور وہ تھائرائڈ کے مسائل کا بھی سامنا کر رہی ہیں، اس کے باوجود تنقید کرنے والے لوگ صورتحال کو سمجھے بغیر طنزیہ رویّہ اختیار کیے ہوئے ہیں۔
انہوں نے کہا کہ ایسے پیجز اور ان پر نازیبا تبصرے کرنے والوں پر انہیں افسوس ہے،اپنے بیان کے آخر میں متھیرا نے دو ٹوک انداز میں کہا کہ وہ ایک تنگ نظر معاشرے میں حوصلے اور اعتماد کے ساتھ زندگی گزار رہی ہیں اور آگے بھی ایسے ہی بڑھتی رہیں گی، ان کے بقول"میں اپنے لیے اسی طرح چلوں گی جیسے دنیا پر میرا ہی اختیار ہو"۔
