نیویارک : (ویب ڈیسک ) متوازن غذا کا باقاعدگی سے استعمال انسانی صحت کیلئے بے حد ضروری ہے، ان میں دماغی صحت سے متعلق بہترین وٹامن کا نام ’وٹامن بی‘ ہے۔
قدرتی طور پر ہر غذا میں وٹامنز پائے جاتے ہیں، طبی ماہرین کا کہنا ہے کہ خلیات کے عام کام، نشوونما اور ترقی کے لیے 13 وٹامن ضروری ہیں، اس کے علاوہ بھی کئی وٹامنز ہیں اور ان میں سے ہر ایک کا دماغ کے لیے ایک اہم کام ہوتا ہے، وٹامن بی کی آٹھ اقسام ہیں ، تاہم یہ ضروری ہے کس خوراک میں کون سا وٹامن موجود ہوتا ہے تاکہ اسی مناسبت سے استعمال کیا جائے ۔
وٹامن بی ون
وٹامن بی ۔ون بنیادی خلیوں کے افعال اور مختلف غذائی اجزاء کے میٹابولزم کے ساتھ ہمیں توانائی حاصل کرنے میں مدد کرتا ہے ، اس کی کمی، علم حاصل کرنے کی صلاحیت کو کمزور کرنے کے ساتھ ساتھ جسم میں دیگر مسائل کا باعث بھی بن سکتی ہے۔
وٹامن بی 12
وٹامن بی 12 خون کے سرخ خلیات اور ڈی این اے کی تشکیل کے لیے ضروری ہے لیکن یہ اعصابی نظام کی نشوونما اور اس کے کام کو معاونت فراہم کرتا ہے، یہ دماغ کی نشوونما کے لیے اور بھی امور سرانجام دیتا ہے جیسے ہوموسسٹین کو توڑنے میں مدد، جو کہ دل کو نقصان پہنچانے والا پروٹین ہے اور جو ڈیمنشیا کی کسی شکل کا باعث بھی بن سکتا ہے۔
وٹامن بی 9
یہ وٹامن جو فولک ایسڈ ہے، نیورو ٹرانسمیٹر فنکشن اور دماغی صحت میں مدد کرتا ہے، ڈی این اے کی تشکیل میں تعاون کرتا ہے اور مسام دار خلیوں کے اندر کے زہر کو کم کرنے کے لیے مؤثر ہے۔ فولک ایسڈ کی کمی مزاج میں تبدیلی کا باعث بنتی ہے ۔
لہٰذا صرف سبز پتوں والی سبزیاں کھانے سے، جو اکثر قدرتی وٹامن B-9 فولک ایسڈ سے بھرپور ہوتی ہیں، آپ کا موڈ اور جذباتی صحت برقرار رہتی ہے، بی وٹامنز میں موجود عام عوامل ہماری ذہنی صحت کے لیے ضروری عناصر ہیں۔
دیگر بی وٹامنز
دیگر بی وٹامنز دماغ کے ساتھ ساتھ جسم کیلئے بھی بہت ضروری ہے ، کچھ کا دماغ سے زیادہ براہ راست تعلق ہوتا ہے، جیسے وٹامن B-12، B-9 اور B-1 اور دوسرے جسم کے دیگر انتہائی ضروری افعال میں مدد کرتے ہیں، جیسے خون کے خلیات کی تشکیل وغیرہ۔ لہٰذا، براہ راست یا بالواسطہ، ان کا تعلق دماغی کام سے ہے۔
وٹامن بی حاصل کرنےکے ذرائع
تمام اقسام کی پھلیاں، اناج اور دالیں وٹامن بی سے بھرپور ہوتی ہیں، سبز پتوں والی سبزیاں فولک ایسڈ سے بھرپور ہوتی ہیں، ڈیری مصنوعات خصوصاً دہی میں رائبوفلاوین ہوتا ہے، جو وٹامن B-2 ہے اور اس میں وٹامن B-12 بھی ہوتا ہے۔ ہمیشہ قدرتی دہی کی قسم کا انتخاب کریں۔ اگر آپ انڈے کھاتے ہیں، تو کھلے ماحول میں پرورش پانے والی (دیسی) مرغیوں کے انڈے خریدنے کو ترجیح دیں، جو کہ وٹامن بی 7 سے بھرپور ہوتے ہیں جو کہ بایوٹین ہے۔
سامن مچھلی بی وٹامنز سے بھرپور ہوتی ہے، جس میں وٹامن بی-2 یا رائبوفلاوین، وٹامن بی-3 یا نیاسین، وٹامن بی-6 یا پائریڈوکسین، اور وٹامن بی-12 یا کوبالامن شامل ہیں۔ یہ سب دماغ کی مدد کرتے ہیں۔
سورج مکھی کے بیج وٹامن B-5 حاصل کرنے کے بہترین ذرائع میں سے ایک ہیں، جسے پینٹوتھینک ایسڈ کہا جاتا ہے۔ اس وٹامن کی تجویز کردہ روزانہ کی ضرورت کا 20 فیصد ان بیجوں کے صرف ایک اونس (28 گرام) سے حاصل کیا جا سکتا ہے۔
