کراچی: (دنیا نیوز) سندھ ہائی کورٹ نے گمشدہ افراد کی بازیابی میں پیشرفت نہ ہونے پر شدید برہمی کا اظہار کرتے ہوئے ہوم سیکرٹری کو فوری طلب کر لیا۔ عدالت نے ریمارکس دیئے کہ ہوم سیکرٹری اجلاسوں میں چائے پی کر چلا جاتا ہے، دستخط کا بھی وقت نہیں ، ہوم سیکرٹری کو یہاں دن بھر کھڑا رکھیں گے۔
سندھ ہائی کورٹ میں 107 لاپتہ افراد کی بازیابی کے کیس کی سماعت ہوئی۔ عدالت نے کہا لوگ قرآن اٹھا رہے ہیں ، کیا جے آئی ٹیز اور ٹاسک فورس والوں کو کوئی خدا کا خوف نہیں ، کہہ چکے جے آئی ٹیز ، ٹاسک فورس سے کچھ نہیں ہو رہا، انتہائی اقدام پر مجبور نہ کریں ، ورنہ متعلقہ حکام کو جیل بھیجیں گے ، جے آئی ٹیز ٹاسک فورس وقت ضائع کر رہے ہیں۔
