نارروال: وزیرِ داخلہ احسن اقبال پر قاتلانہ حملہ، گولی لگنے سے زخمی

ترجمان پنجاب حکومت ملک احمد خان نے دنیا نیوز سے خصوصی گفتگو میں بتایا کہ احسن اقبال کے بازو پر گولی لگی، اللہ تعالیٰ کا شکر ہے کہ ان کی حالت خطرے سے باہر ہے۔ وزیرِ داخلہ کو ہسپتال میں طبی امداد دی جا رہی ہے۔

حملہ کرنے والے شخص کے بارے میں بتاتے ہوئے انہوں نے کہا کہ ملزم مقامی گاؤں کا رہائشی ہے جسے گرفتار کر لیا گیا ہے اور اس سے ابتدائی تحقیقات کی جا رہی ہیں۔

ادھر رکن صوبائی اسمبلی رانا عبدالمنان کا دنیا نیوز سے گفتگو میں کہنا تھا کہ میرے ڈیرے پر کارنر میٹنگ نہیں تھی، وزیرِ داخلہ احسن اقبال پر مسیحی برادری کی تقریب سے جاتے ہوئے فائرنگ کی گئی۔

ذرائع کے مطابق احسن اقبال کو 5 دن پہلے حساس اداروں نے خبردار کیا تھا کہ آپ نارووال جلسے میں شرکت نہ کریں کیونکہ آپ پر حملہ ہو سکتا ہے۔ احسن اقبال کو کہا گیا تھا کہ نارووال جلسے سے گریز کریں۔ اداروں نے وارننگ کا مراسلہ یکم مئی کو بھیجا تھا۔

COAS condemns firing on Federal Interior Minister Ahsan Iqbal. Expresses best wishes for early recovery.

— Maj Gen Asif Ghafoor (@OfficialDGISPR) May 6, 2018

وزیرِاعلی پنجاب شہباز شریف نے وزیر داخلہ احسن اقبال کو ٹیلی فون کر کے ان کی خیریت دریافت کی اور فائرنگ کے واقعہ پر دکھ اور افسوس کا اظہار کیا۔ ان کا کہنا تھا کہ ذمہ دار قانون کے تحت سزا سے نہیں بچ پائیں گے، میں خود ذاتی طور پر تحقیقات کا جائزہ لے رہا ہوں۔

آرمی چیف جنرل قمر جاوید باجوہ نے نے وزیرِ داخلہ احسن اقبال پر حملے کی شدید الفاظ میں مذمت کرتے ہوئے ان کی جلد صحتیابی کیلئے دعا کی ہے۔

 ابتدائی طبی رپورٹ کے مطابق احسن اقبال کو ایک ہی گولی لگی جو کہنی سے پھسل کر پیٹ کے نچلے حصہ میں لگی تاہم انٹریوں کو نقصان نہیں پہنچا۔ مسلم لیگ (ن) کے رہنما زعیم قادری نے بتایا ہے کہ احسن اقبال کا ڈاکٹرز سی ٹی سکین کر رہے ہیں، آپریشن کر کے گولی کو نکال دیا جائے گا۔

Allah Almighty hs been very kind. We request all friends and wellwishers to remember him their special prayers. — at Services Institute Of Medical Sciences https://t.co/2oEcY6uATa

— Ahsan Iqbal (@betterpakistan) May 6, 2018

وفاقی وزیرِ داخلہ چودھری احسن اقبال نے سماجی رابطوں کی ویب سائٹ ٹویٹر کے ذریعے عوام کو اپنی صحت سے آگاہ کیا اور جلد صحت یابی کیلئے دعا کی اپیل کی۔ انہوں نے لکھا کہ اللہ تعالیٰ بہت مہربان ہے۔ تمام دوستوں سے درخواست ہے کہ دعاؤں میں یاد رکھیں۔

سروسز ہسپتال میں احسن اقبال کا کامیاب آپریشن کر کے ان کے پیٹ سے گولی نکال لی گئی ہے۔ ڈاکٹروں نے بھی احسن اقبال کی حالت تسلی بخش قرار دیدی ہے۔ دنیا نیوز سے خصوصی گفتگو میں احسن اقبال کا کہنا تھا کہ میرا حوصلہ بلند ہے، خدا نے بڑے حادثے سے بچا لیا، پوری قوم اور گھر والوں کی دعائیں میرے ساتھ ہیں۔

ان کا کہنا تھا کہ میری طبیعت پہلے سے بہت بہتر ہے۔ ڈاکٹروں سے بات کی ہے، فکر کی کوئی بات نہیں، جلد صحت یاب ہو کر قوم کی خدمت کے لئے حاضر ہو جاؤں گا۔