بیجنگ: (دنیا نیوز) آرمی چیف جنرل قمر جاوید باجوہ نے چینی صدر سے ملاقات میں انھیں یقین دہانی کرائی ہے کہ سی پیک تمام مشکلات کے باجود کامیاب ہو گا۔ اس موقع پر شی جن پنگ کا کہنا تھا کہ پاکستان ہر آزمائش پر پورا اترنے والا آزمودہ دوست ہے۔
پاک فوج کے سربراہ جنرل قمر جاوید باجوہ نے چینی صدر شی جنگ پنگ کی خصوصی دعوت پر ان سے ملاقات کی جس میں خطے کو درپیش چیلنجز، سیکیورٹی صورتحال اور ان کے حل پر بھی بات کی گئی۔
پاک فوج کے شعبہ تعلقاتِ عامہ (آئی ایس پی آر) کے مطابق چینی صدر شی جن پنگ کا اس موقع پر کہنا تھا کہ پاکستان ہر آزمائش پر پورا اترنے والا دوست ہے اور دونوں ممالک کے دیرپا تعلقات میں پاک فوج کا بڑا اہم کردار ہے۔ چینی صدر نے پاک فوج کے پروفیشنل ازم کی تعریف کی اور خطے میں امن و استحکام کیلئے اس کے کردار کو سراہا۔
صدر شی جنگ پنگ نے خطے میں امن و استحکام کیلئے پاک فوج کی کوششوں کو تسلیم کرتے ہوئے یقین دہانی کرائی کہ چین پاکستان کی بطور سٹریٹجک پارٹنر کے حمایت جاری رکھے گا۔
“While we work for peace we need to stay strong to thwart designs of all inimical forces challenging our resolve and we greatly value Chinese support in this regard”, COAS. pic.twitter.com/cBnOJvStNV
— Maj Gen Asif Ghafoor (@OfficialDGISPR) September 19, 2018
آرمی چیف جنرل قمر جاوید باجوہ نے خصوصی دعوت اور خطے میں امن و استحکام کے لیے پاک فوج کی کوششوں کو تسلیم کرنے پر چینی صدر کا شکریہ ادا کیا۔
آرمی چیف جنرل قمر جاوید باجوہ کا کہنا تھا کہ پاکستان خطے میں امن کی اہمیت کو سمجھتا ہے، امن کے حصول کے لیے پاکستان نے بہت قربانیاں دی ہیں، ون بیلٹ ون روڈ اور سی پیک منصوبہ تمام مشکلات کے باجود کامیاب ہو گا۔
