کوئٹہ: (دنیا نیوز) کوئٹہ سمیت بلوچستان بھر کے سرکاری و نجی ہسپتالوں میں ڈاکٹروں پت تشدد کے واقعات کے خلاف ہڑتال جاری ہے، او پی ڈیز سمیت آپریشن تھیٹروں میں ڈاکٹروں کا مکمل بائیکاٹ کیا جا رہا ہے۔
ڈاکٹر ایکشن کمیٹی کی جانب سے بی ایم سی برن وارڈ، سول ہسپتال اور نجی ہسپتال میں ڈاکٹروں کے خلاف مریضوں کے اہل خانہ کی جانب سے کئے گئے تشدد کے واقعات کے خلاف دو روزہ ہڑتال کا اعلان کیا گیا تھا جو آج سے شروع ہوگئی۔ سول ہسپتال، بی ایم سی سمیت صوبے بھر کے سرکاری و نجی ہسپتالوں کی او پی ڈیز کے ساتھ ساتھ آپریشن تھیٹروں میں بھی ڈاکٹروں نے احتجاجا کام بند کر رکھا ہے جبکہ شعبہ حادثات میں ڈاکٹر اپنی ڈیوٹیاں سر انجام دے رہے ہیں۔
ڈاکٹر ایکشن کمیٹی کے ترجمان ڈاکٹر کلیم اللہ کے مطابق سرکاری و نجی ہسپتالوں میں مریضوں کے ساتھ آئے لوگ نہ صرف ڈاکٹروں کو تشدد کا نشانہ بناتے ہیں بلکہ سنگین نتائج کی دھمکیاں بھی دی جاتی ہیں۔ امداد چوک پر 2 روز قبل ڈاکٹر پر فائرنگ بھی کی گئی جس میں 2 افراد زخمی ہوئے، حکومت ان واقعات کا سدباب کرے۔
دوسری جانب دور دراز علاقوں سے آئے مریضوں کو طبی سہولیات کی عدم فراہمی پر مشکلات کا سامنا کرنا پڑ رہا ہے۔
