اسلام آباد: (دنیا نیوز) پاکستان نے کہا ہے کہ چین پاکستان اقتصادی راہداری انقلابی منصوبہ ہے جس سے ملکی ترقی میں واضح تبدیلی دیکھی جا رہی ہے۔
دفتر خارجہ کی ترجمان عائشہ فاروقی نے واضح کیا کہ چین پاکستان اقتصادی راہداری (سی پیک) کے منصوبوں سے متعلق حکومتی قرضے ہمارے مجموعی قرضوں کے دس فیصد سے بھی کم ہیں۔اس کے علاوہ چین سے لئے گئے قرضوں کی ادائیگی کی مدت 20 سال اور ان پر شرح سود 2.34 فیصد ہے اور اگر گرانٹس کو شامل کیا جائے تو سرح سود کم ہو کر تقریباً دو فیصد تک رہ جائے گی۔
انہوں نے کہا کہ پاکستان کے سی پیک سے متعلق قرضوں کے حوالے سے بعض تجزیہ کاروں اور حکومتی عہدیداروں کی جانب سے کئے گئے دعوے حقائق کے برعکس ہیں۔
عائشہ فاروقی کا کہنا تھا کہ سی پیک ایک خطہ ایک سڑ ک منصوبے کا اہم منصوبہ ہے۔ علاقائی اقتصادی روابط کو فروغ دینے سے خطے بھر میں کثیر جہتی ترقی کی راہ ہموار کرنے میں مدد ملے گی۔
ترجمان دفتر خارجہ کا کہنا تھا کہ چین پاکستان اقتصادی راہداری طویل مدتی منصوبہ ہے جس سے پاکستان کو توانائی بنیادی ڈھانچے اور صنعتی ترقی سمیت روزگار کے مواقع پیدا کرنے میں مدد ملے گی۔ پاکستان اور چین سدا بہار دوست اور مضبوط تعاون پر مبنی شراکت دار ہیں۔
ان کا کہنا تھا کہ دونوں ملک باہمی احترام مفادات اور مشترکہ تعاون ترقی کے اصولوں کے تحت خطے میں امن و استحکام اور ترقی کو فروغ دینے کیلئے کوشاں ہیں۔ پاکستان اور چین نے باہمی دلچسپی کے امور پر بات چیت کے مختلف طریقوں پر غور کیا ہے۔ دونوں ملک ان معاملات کے حل کیلئے ایک دوسرے سے باقاعدگی سے رابطے میں ہیں۔
