راولپنڈی: (دنیا نیوز) خطے میں امن کو برباد کی راہ پر نکلنے والا بھارت لائن آف کنٹرول (ایل او سی) پر فائرنگ سے باز نہ آیا، فائرنگ کی زد میں آ کر خاتون زخمی ہو گئی۔
پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق بھارتی فوج نے لائن آف کنٹرول (ایل او سی) کے علاقے کھوئی رٹہ سیکٹر پر جنگ بندی معاہدے کی خلاف ورزی کرتے ہوئے فائرنگ کی۔
آئی ایس پی آر کے مطابق بھارت کی طرف سے لائن آف کنٹرول (ایل او سی) پر سول آبادی پر بلااشتعال فائرنگ کی جس کی زد میں آ کر ایک خاتون زخمی ہو گئی۔
پاک فوج کے شعبہ تعلقات عامہ کے مطابق بھارتی فوج کی طرف سے فائرنگ کے بعد پاک فوج نے موثر جوابی دیا اور بھارتی چوکیوں کو نشانہ بنایا۔ بھارتی فوج کی جانب سے ایل او سی پر مسلسل شہری آبادی کو نشانہ بنایا جا رہا ہے اور جنگ بندی معاہدے کی خلاف ورزیاں کی جا رہی ہیں
اس سے قبل بھارتی سینئر سفارتکار کو دفتر خارجہ طلب کر کے 14 اگست کو قابض بھارتی افواج کی جانب سے لائن آف کنٹرول (ایل اوسی) کے دھودنیال سیکٹر میں جنگ بندی کی بلااشتعال خلاف ورزیوں پر شدید احتجاج ریکارڈ کیا گیا۔ بھارتی فوج کی بلااشتعال فائرنگ کے نتیجے میں تین سالہ معصوم بچی شدید زخمی ہوگئی۔
یہ بھی پڑھیں: ایل او سی پر فائرنگ: بھارتی سینئر سفارتکار کی دفتر خارجہ طلبی، شدید احتجاج ریکارڈ
ترجمان دفتر خارجہ کے مطابق سینئر بھارتی سفارتکار کو دفتر خارجہ طلب کر کے احتجاجی مراسلہ ان کے حوالہ کیا اور کہا گیا کہ قابض بھارتی افواج ایل او سی اور ورکنگ باﺅنڈری کی مسلسل خلاف ورزیاں کرتے ہوئے آرٹلری، بھاری اور خودکار ہتھیاروں کے ذریعے عام شہری آبادیوں کو نشانہ بنارہی ہیں۔
زاہد حفیظ کا کہنا تھا کہ بھارتی سفارتکار کا بتایا گیا کہ شہری آبادیوں کو دانستہ نشانہ بنانا انتہائی قابل افسوس، انسانی عظمت ووقار، عالمی انسانی حقوق اور بین الاقوامی انسانی قوانین کے صریحاً منافی ہے۔ بھارت کی جانب سے جنگ بندی کی ان خلاف ورزیوں سے علاقائی امن و سلامتی کو سنگین خطرات لاحق ہیں جس کا نتیجہ سٹرٹیجک غلطی کی صورت نکل سکتا ہے۔
دفتر خارجہ کے مطابق بھادت نے رواں سال کے دوران 1980ءمرتبہ بلا اشتعال جنگ بندی کی خلاف ورزیاں کی ہیں جس میں 16 بیگناہ شہر ی شہید اور 161 زخمی ہوئے ہیں۔
انہوں نے کہا کہ بھارتی سفارتکار کو آگاہ کیا گیا کہ ایل او سی پر کشیدگی میں اضافے سے بھارت مقبوضہ کشمیر میں انسانی حقوق کی سنگین خلاف ورزیوں اور مظالم سے عالمی توجہ ہٹا نہیں سکتا۔
ترجمان دفتر خارجہ کے مطابق بھارت پر زوردیا گیا کہ وہ 2003ءکے جنگ بندی معاہدے کی پاسداری کرے، جنگ بندی کی خلاف ورزیوں کے ان واقعات کی تحقیقات کرائے، بھارتی فوج کو جنگ بندی کے احترام کا حکم دے۔
زاہد حفیظ کا مزید کہنا تھا کہ ایل او سی اور ورکنگ باونڈری پر اس کی روح کے مطابق امن برقرار رکھے اور اقوام متحدہ کی سلامتی کونسل کی قرار دادوں کے مطابق بھارت اقوام متحدہ کے فوجی مبصرین (یواین ایم او جی آئی پی)کو اپنا کردارادا کرنے کی اجازت دے۔
