اسلام آباد: (دنیا نیوز) چیف جسٹس آف پاکستان جسٹس گلزار احمد نے کہا ہے کہ چاہے کیسے ہی حالات کیوں نہ ہوں، عدلیہ کی خود مختاری پر کبھی سمجھوتہ نہیں کریں گے۔
جسٹس فیصل عرب کی ریٹائرمنٹ کے حوالے سے سپریم کورٹ بار ایسوسی ایشن کی جانب سے منعقدہ عشائیے کی تقریب سے خطاب میں چیف جسٹس آف پاکستان جسٹس گلزار احمد نے کہا کہ بینچ اور بار لازم ملزوم ہیں۔ آزاد عدلیہ پاکستانی معاشرہ کا اہم جزو ہے۔
کھلی فضا میں سجائی گئی تقریب اس وقت کشت زعفران بن گئی جب چار نومبر کو ریٹائر ہونے والے جسٹس فیصل عرب نے کہا کہ اتنے لوگ دیکھ کر تو مجھے اپنی شادی یاد آ گئی۔
انہوں نے ایک موقع پر کہا کہ میں پہلی دفعہ ریٹائر نہیں ہو رہا، ایک دفعہ پہلے بھی 3 نومبر کو مجھے گھر بھیج دیا گیا تھا۔ خیال رہے 3 نومبر 2007ء کے دن سابق صدر پرویز مشرف نے ایمرجنسی نافذ کرکے اعلیٰ عدلیہ کے جج صاحبان کو گھر بھیج دیا تھا۔
سپریم کورٹ بار کے صدر سید قلب حسن نے تقریب سے خطاب میں کہا کہ وکلا برادری اعلیٰ عدلیہ کے جج صاحبان کو یہ یقین دلاتی ہے کہ ججز انصاف پر مبنی فیصلے کریں، ہم سیسه پلائی دیوار کی طرح آپ کے ساتھ کھڑے ہوں گے۔
چیئرمین ایگزیکٹو کمیٹی اعظم نذیر تارڑ نے کہا وکلا برادری ہمیشہ عدلیہ کے ساتھ کھڑی ہوئی، چاہے وہ منصف کے خلاف ریفرنس دائر ہو یا عدلیہ کو خود مختاری کا معامله ہو، بار ہمیشہ خود مختار عدلیہ کے ساتھ کھڑی رہے گی۔
