اسلام آباد: (اے پی پی) پاکستان اور بھارت نے آبی معاملات کو حل کرنے کے لئے کوششیں کرنے، معائنہ کے لئے دورے اور پاک بھارت مستقل انڈس کمیشن کا اگلا اجلاس جلد پاکستان میں منعقد کرنے پر اتفاق کیا ہے۔
ترجمان دفتر خارجہ کے مطابق پاک بھارت مستقل انڈس کمیشن (پی آئی سی) کا 116 واں اجلاس 23-24 مارچ کو نئی دہلی میں منعقد ہوا۔
سندھ طاس معاہدہ (آئی ڈبلیو ٹی) کی متعلقہ دفعات کے تحت یہ اجلاس سالانہ باری باری پاکستان اور بھارت میں منعقد ہوتا ہے۔ پاکستا ن کی قیادت کمشنر برائے انڈس واٹرز سید محمد مہر علی شاہ کر رہے تھے۔
اجلاس کے دوران سندھ طاس معاہدہ سے متعلق مختلف معاملات زیر بحث لائے گئے۔ پاکستان نے پکل دل ، لوئر کلنائی ، دربوک شیوک اور نمو چلنگ سمیت بھارتی منصوبوں پر اپنے اعتراضات کا اعادہ کیا۔
پاکستان نے بھارت پر زور دیا کہ وہ سندھ طاس معاہدہ کی دفعات کے تحت سیلاب کے بہاؤ کے اعدادوشمار شیئر کرے۔
ترجمان دفتر خارجہ کے مطابق پاکستان نے سندھ طاس معاہدہ کی دفعات کے تحت تمام اہم۔معاملات کے جلد حل کی اہمیت پر زور دیا۔
