اسلام آباد: (دنیا نیوز) وزیراعظم عمران خان نے بلوچستان میں دہشت گرد حملوں کی مذمت کرتے ہوئے عزم کا اظہار کیا ہے کہ دہشت گردوں کےخلاف جنگ جاری رکھیں گے۔
کوئٹہ اور تربت میں دہشتگردوں کے بزدلانہ حملوں کے ردعمل میں وزیراعظم عمران خان نے اپنے بیان میں کہا ہے کہ بلوچستان میں امن تباہ کرنے کی اجازت نہیں دیں گے۔ دہشت گرد حملوں میں 4 جوان شہید اور 8 زخمی ہوئے، میری دعائیں اور ہمدردیاں شہدا کے اہلخانہ کے ساتھ ہیں۔
واضح رہے کہ گذشتہ روز کوئٹہ کے قریب پیر اسماعیل زیارت میں ایف سی چیک پوسٹ پر حملہ کیا گیا جس کے دوران چار جوان شہید اورچھ زخمی ہوئے۔ جوابی کارروائی میں پانچ دہشت گرد مارے گئے جبکہ آٹھ زخمی ہوئے۔ دوسرے حملے میں تربت میں ایف سی کی گاڑی کو بارودی مواد سے نشانہ بنایا گیا جس میں 2 اہلکار زخمی ہوئے۔
