اسلام آباد: (دنیا نیوز) وزیراعظم عمران خان نے کہا ہے کہ سیّد علی گیلانی نے کشمیریوں کےحق خود ارادیت کیلئے اپنی آخری سانس تک جدوجہد جاری رکھی۔
تفصیلات کے مطابق وزیراعظم عمران خان سے آزاد کشمیر کے وزیر اعظم سردار عبد القیوم نیازی نے ملاقات کی، ملاقات کے دوران کشمیری حریت لیڈر سید علی گیلانی کیلئے فاتحہ ادا کی گئی۔
ملاقات کے دوران گفتگو کرتے ہوئے عمران خان کا کہنا تھاکہ سیّد علی گیلانی نے کشمیریوں کےحق خود ارادیت کیلئے اپنی آخری سانس تک جدوجہد جاری رکھی۔ پاکستان کی عوام کی تمام تر ہمدردیاں سوگواران کے ساتھ ہیں۔
وزیراعظم عمران خان اور آزاد کشمیر کے وزیراعظم سردار عبد القیوم نیازی کے درمیان ملاقات کے دوران آزاد کشمیر میں گورننس سمیت دیگر معاملات پر بھی گفتگو کی۔
یہ بھی پڑھیں: سیّد علی گیلانی کا انتقال، صدر، وزیراعظم سمیت دیگر کا اظہار افسوس
گزشتہ روز بھی وزیراعظم عمران خان نے سماجی رابطے کی ویب سائٹ ٹویٹر پر لکھا تھا کہ مقبوضہ کشمیر کے حریت رہنما سیّد علی گیلانی کے انتقال کا سن کر افسوس ہوا، انہوں نے اپنی تمام زندگی کشمیر کی آزادی اور ان کے حقوق کے لیے صرف کی۔ انہوں نے قابض بھارتی انتظامیہ کی طرف سے نظر بندی اور تشدد کا بھی سامنا کیا، اور ہمیشہ پر عزم رہے۔
Deeply saddened to learn of the passing of Kashmiri freedom fighter Syed Ali Geelani who struggled all his life for his people & their right to self determination. He suffered incarceration & torture by the Occupying Indian state but remained resolute.
— Imran Khan (@ImranKhanPTI) September 1, 2021
وزیراعظم عمران خان نے لکھا کہ بطورِ پاکستان ہم ان کی خدمات کو خراج تحسین پیش کرتے ہیں اور ان کے الفاظ ’ہم پاکستانی ہیں اور پاکستان ہمارا ہے‘ ہمیشہ یاد رکھے جائیں گے۔
We in Pakistan salute his courageous struggle & remember his words: "Hum Pakistani hain aur Pakistan Humara hai". The Pakistan flag will fly at half mast and we will observe a day of official mourning.
— Imran Khan (@ImranKhanPTI) September 1, 2021
ٹویٹر پر وزیراعظم عمران خان نے سیّد علی گیلانی کے انتقال پر ایک روزہ سرکاری سوگ کا اعلان کرتے ہوئے کہا کہ جھنڈا سر نگوں رہے گا۔
