لاہور:(دنیا نیوز)پاکستان مسلم لیگ (ق) کی جانب سے یہ فیصلہ کیا گیا ہے کہ حکومت کی حمایت جاری رکھیں گے۔
سپیکر پنجاب اسمبلی چودھری پرویزالہٰی نے حکومت کی حمایت کے فیصلے کی منظوری دی جبکہ مسلم لیگ ق کی پارلیمانی پارٹی نے تحفظات کے اظہار کےبعد فیصلوں کا اختیار پرویزالہٰی کو دیا تھا۔
وزیراعظم کی اتحادی جماعتوں کےاجلاس میں وفاقی وزیر مونس الہٰی اورطارق بشیر چیمہ نے شرکت کی جبکہ اس موقع پر چودھری مونس الہٰی نے کہا کہ مسلم لیگ ق پارلیمنٹ کے مشترکہ اجلاس میں قانون سازی کو سپورٹ کرے گی ۔
گزشتہ روز پاکستان مسلم لیگ(ق) نے انتباہ تھا کہ مہنگائی اور بیروزگاری میں اضافہ قابل تشویش ہے اس لئے حکومت کے ساتھ چلنا مشکل ہوتا جارہا ہے، عوامی نمائندے اپنے حلقوں میں عوام کا سامنا کیسے کریں ؟عام آدمی کو ریلیف نہ دیا گیا تو حالات مزید خراب ہونگے جبکہ اہم اجلاس میں فیصلوں کا اختیار چودھری پرویز الہٰی کو سونپ دیا گیا تھا ۔
لاہور میں پاکستان مسلم لیگ کی پارلیمانی پارٹی کا اجلاس منعقد ہوا تھا ،مسلم لیگ پنجاب کے صدر چودھری پرویزالٰہی نے اجلاس کی صدارت کی جبکہ تمام ارکان نے چودھری شجاعت حسین کی صحت یابی کیلئے دعا کی۔
اجلاس میں مسلم لیگی ارکان اسمبلی نے بڑھتی ہوئی بیروزگاری اور مہنگائی ،ڈالر، پٹرول، بجلی اور گیس کی بڑھتی ہوئی قیمتوں اور امن و امان کی ابتر صورتحال پر بھی تشویش کا اظہار کیا تھا۔
اجلاس کا اعلامیہ جاری کیا گیا جس میں کہا گیا تھا کہ ان تمام وجوہات کی بنا پر حکومت کے ساتھ چلنا مشکل ہوتا جا رہا ہے ، عوامی نمائندے اپنے حلقوں میں عوام کا سامنا کیسے کریں ، عام آدمی اذیت میں مبتلا ہے جبکہ حکومت عوامی مشکلات کے تدارک میں ناکام دکھائی دیتی ہے۔
اعلامیہ میں مزید کہا گیا تھا کہ حکومت نان ایشوز کو ایشوز بنا کر عام آدمی کے زخموں پر نمک چھڑک رہی ہے ، عام آدمی کو ریلیف نہ دیا گیا تو حالات مزید بگڑیں گے ، حکومت سنجیدگی سے ان تمام ایشوز کا فی الفور ازالہ کرے ۔
پارلیمانی پارٹی کے اجلاس میں تمام ارکان اسمبلی کی جانب سے فیصلوں کا اختیار چودھری پرویزالٰہی کو دیدیا گیا تھا جبکہ اجلاس میں وفاقی وزراء طارق بشیر چیمہ ،مونس الٰہی اور سینیٹر کامل علی آغا شریک ہوئے تھے۔
ارکان قومی اسمبلی سالک حسین، حسین الٰہی اور مسز فرخ خان ،صوبائی وزراء حافظ عمار یاسر اور باؤ رضوان ،ارکان پنجاب اسمبلی ساجد احمد خان بھٹی، عبداللہ یوسف وڑائچ ،ڈاکٹر محمد افضل اور احسان الحق چودھری ،شجاعت نواز اجنالہ اور خدیجہ عمر مفتی عبیدالرحمٰن اورشافع حسین بھی اجلاس میں شریک ہوئے۔
