کراچی: (دنیا نیوز) شیرشاہ پراچہ چوک کے قریب نالے میں گیس بھر جانے سے دھماکے کا ایک اور واقعہ پیش آگیا۔
واضح رہے کہ 19 دسمبر 2021 کو شیرشاہ پراچہ چوک پر نالے میں گیس بھرنے سے خوفناک دھماکا ہوا تھا جس کے نتیجے میں 17 افراد جاں بحق ہوئے تھے۔
دوسری طرف شیر شاہ پراچہ میں تجازوات کے خلاف جاری آپریشن کے دوران بلال ہوٹل کے قریب نالے میں گیس بھر جانے سے زوردار دھماکا ہوا۔
دھماکے میں ایک گھر کی دیوار گر گئی اور کچھ گھروں کی دیواروں پر دراڑیں پڑ گئیں۔ دھماکا نالے پر قائم رہائشی علاقے میں ہوا جہاں ہوٹل اور گھر تعمیر تھے۔
پولیس کا کہنا ہے کہ دھماکے کےنتیجے میں کسی جانی نقصان کی اطلاع نہیں، نالے سے تجاوزات ختم کرنے کے احکامات دئیے گئے تھے۔
اطلاع ملنے پر ریسکیو ٹیموں کو طلب کر لیا گیا اور دیگر محکموں کو بھی صورتحال سے آگاہ کیا گیا ہے۔ متاثرہ مقام سے لوگوں کو پیچھے ہٹا کر پولیس نفری تعینات کر دی گئی ہے۔
