لاہور: (ویب ڈیسک) سابق وزیراعظم اور پاکستان مسلم لیگ ن کے قائد میاں محمد نواز شریف نے پاکستان تحریک انصاف پر تنقید کرتے ہوئے لکھا کہ ہمیں بحیثیت قوم ان شرپسندوں کا راستہ روکنا ہو گا۔
سماجی رابطے کی ویب سائٹ ٹویٹر پر ایک بیان میں انہوں نے پاکستان تحریک انصاف (پی ٹی آئی) کے چیئر مین عمران خان کی جانب سے لانگ مارچ کے اعلان پر پر تنقید کرتے ہوئے لکھا کہ عوام کو ان فتنہ پرور شرپسند جتھوں کے رحم و کرم پر نہیں چھوڑا جا سکتا جو پہلے ہی ان پر غربت، مہنگائی اور بیروزگاری کے پہاڑ گرا چکے ہیں۔
نواز شریف نے مزید لکھا کہ ایسے تخریب کاروں کا قلع قمع کئے بغیر پاکستان اپنی حقیقی منزل نہیں پا سکتا۔ ہمیں بحیثیت قوم ان شرپسندوں کا راستہ روکنا ہو گا۔
لانگ مارچ، اتحادیوں کو اعتماد میں لیں، ہر فیصلے میں زرداری کو ساتھ رکھیں: نواز شریف
سابق وزیراعظم اور پاکستان مسلم لیگ ن کے قائد میاں محمد نواز شریف نے کہا ہے کہ کہا کہ اگر آئی ایم ایف عوامی ریلیف پیکیج نہیں ملتا تو بڑے فیصلے کر لیے جائیں، لانگ مارچ پر اتحادیوں کو مکمل اعتماد میں لیا جائے، ہر فیصلے میں سابق صدر آصف زرداری کو ساتھ رکھا جائے۔
مسلم لیگ ن کا اہم مشاورتی اجلاس ہوا، اجلاس کے دوران ملکی سیاسی صورتحال، پاکستان تحریک انصاف (پی ٹی آئی) کے لانگ مارچ اور قبل از وقت انتخابات پر مشاورت کی گئی۔
مشاورتی اجلاس کے دوران سابق وزیراعظم اور پاکستان مسلم لیگ ن کے قائد میاں محمد نواز شریف بھی لندن سے ویڈیو لنک کے ذریعے شریک تھے۔
اجلاس میں عالمی مالیاتی ادارے (آئی ایم ایف) سے ہونے والے مذاکرات پر بھی مشاورت کی گئی۔ پنجاب میں نمبر گیم کے حوالے سے وزیراعظم شہباز شریف اور وزیراعلیٰ پنجاب حمزہ شہباز نے آگاہ کیا۔
ذرائع کے مطابق اجلاس کے دوران یہ بھی فیصلہ کیا گیا کہ پنجاب کے بڑے شہروں میں مزید جلسے کیے جائیں۔
نواز شریف نے مشورہ دیتے ہوئے کہا کہ اگر آئی ایم ایف عوامی ریلیف پیکیج نہیں ملتا تو بڑے فیصلے کر لیے جائیں، پچھلی حکومت کا ملبہ ہم کیوں اپنے سر لیں، ملک کو انتشار کرنے والوں کے رحم و کرم نہ چھوڑا جائے۔ لانگ مارچ کا شور عالمی مالیاتی ادارے سے مذاکرات کو متاثر کرنے کے لیے مچایا گیا۔
اپنی بات کو جاری رکھتے ہوئے انہوں نے کہاک ہ لانگ مارچ پر اتحادیوں کو مکمل اعتماد میں لیا جائے، ہر فیصلے میں سابق صدر آصف زرداری کو ساتھ رکھا جائے، انتخابی اصلاحات کا بل جلد تیار کرکے اسے قومی اسمبلی سے پاس کرایا جائے۔ چیئرمین نیب کی تعیناتی کے لیے فوری اپوزیشن لیڈر سے مشاورت کا آغاز کیا جائے۔
اجلاس کے دوران پاکستان مسلم لیگ ن کی نائب صدر مریم نواز نے کہا کہ فریش مینڈیٹ قومی و عوامی مسائل کا حل ہے۔
