لاہور : (دنیا نیوز) وزیراعلیٰ پنجاب حمزہ شہباز نے کہا ہے کہ کسی گروہ یا جتھے کو قانون ہاتھ میں نہیں لینے دینگے، لاء اینڈ آرڈر کی فضا کو ہرصورت برقرار رکھا جائے۔
تفصیلات کے مطابق وزیراعلیٰ پنجاب حمزہ شہباز کی زیر صدارت اعلیٰ سطح کا اجلاس ہوا جس میں صوبے میں عوام کے جان و مال کے تحفظ کیلئے کئے گئے انتظامات کا جائزہ لیا گیا، اجلاس میں لاہور سے تاوان کے لیے اغواء ہونے والے بچے کی بحفاظت بازیابی کے حوالے سے رپورٹ پیش کی گئی، وزیر اعلی حمزہ شہباز نے بچے کی بحفاظت بازیابی یقینی بنانے پر لاہور پولیس کی کارکردگی کو سراہا۔
اجلاس سے خطاب کرتے ہوئے وزیر اعلی پنجاب حمزہ شہباز نے کہا کہ عوام کے جان و مال کے تحفظ کیلئے ہرممکن اقدام اٹھایا جائے، کسی گروہ یا جتھے کو قانون ہاتھ میں لینے کی اجازت نہیں دی جا سکتی، 25 مئی کو قانون ہاتھ میں لینے والے عناصر کے خلاف بلاامتیاز قانونی کارروائی کی جائے۔
انہوں نے مزید کہا کہ ریاست کی رٹ کو چیلنج نہیں کرنے دیا جائے گا، پنجاب پولیس نے 25 مئی کو جانفشانی اور جذبے سے امن عامہ کی فضا قائم رکھنے کے لئے اقدامات کئے، پنجاب پولیس نے قانون کے نفاذ کے لیے پیشہ وارانہ انداز میں فرائض ادا کئے۔
حمزہ شہباز کا کہنا تھا کہ امن عامہ قائم رکھنے کے لئے پنجاب پولیس کی مکمل سپورٹ جاری رکھیں گے، صوبے کے عوام کے جان ومال کا تحفظ ہماری ذمہ داری ہے جسے ہر صورت نبھائیں گے۔
اجلاس میں وزیر اعلی کو چونیاں ریپ کیس کے حوالے سے بریفنگ دی گئی، حمزہ شہباز نے ہدایت کی کہ چونیاں کیس کو جلد منطقی انجام پر پہنچایا جائے، تفتیش کو ڈی این اے سمپلز اور سائنٹفک انداز سے تیزی سے آگے بڑھایا جائے۔
حمزہ شہباز کی زیر صدارت اعلی سطح میں صوبائی وزراء سردار اویس لغاری، خواجہ سلمان رفیق، عطا تارڑ، رکن پنجاب اسمبلی ذیشان رفیق، چیف سیکرٹری، اعلی پولیس حکام اور متعلقہ افسران نے شرکت کی، رکن پنجاب اسمبلی جہانگیر خانزادہ اور آر پی او شیخوپورہ وڈیو لنک کے ذریعے اجلاس میں شریک ہوئے۔
