اسلام آباد (دنیا نیوز)وفاقی وزیر برائے ماحولیاتی تبدیلی سینیٹر شیری رحمان نے کہا ہے کہ جلسوں میں مخالفین کی نقلیں اتارنے اور اردو ٹھیک کرنے والے خود لٹر اور کلو میں فرق بھول گئے۔
سماجی رابطے کی ویب سائٹ ٹویٹر پر اپنے پیغام میں سینیٹر شیری رحمان کا کہنا ہے کہ دوسروں کی زبان کی غلطیاں تب نکالیں جب آپ خود کوئی غلطی نہ کرتے ہوں، آپ ہر تقریر میں غلطیاں کرتے لیکن ہم آپ کی طرح نقلیں نہیں اتاریں گے۔
آپ ہر تقریر میں قیمتوں کا موازنہ کرتے، آپ کی بدانتظامی کہ وجہ سے ہی قیمتوں میں اضافہ ہوا ہے۔ پی ٹی آئی حکومت کی غلط معاشی پالیسیوں کی وجہ سے ہی روپے کی قدر گر رہی۔ آپ نے تاریخی قرضے لئے، آئی ایم ایف کے ساتھ غلط معاہدہ کر کہ اس کی خلاف ورزی کی یہ سب آپ کے فیصلوں کے ثمرات ہیں۔ 3/3
— SenatorSherryRehman (@sherryrehman) September 16, 2022
وفاقی وزیر نے مزید کہا کہ ہم آپ کی طرح جلسوں میں اس بات کو نہیں اٹھائیں گے کہ آپ کو معلوم نہیں کہ آٹا کلو میں فروخت ہوتا ہے یا لٹر میں، آپ کو یاد رکھنا چاہئے کہ زبان ہر انسان کی پھسل سکتی ہے، غلطی ہر کوئی کر سکتا ہے، آپ ہر تقریر میں قیمتوں کا موازنہ کرتے ہیں، آپ کی بدانتظامی کہ وجہ سے ہی قیمتوں میں اضافہ ہوا ہے۔