لاہور: (دنیا نیوز) لاہور ہائی کورٹ نے رمضان شوگر ملز چلانے کیلئے فوری حکم جاری کرنے کی استدعا مسترد کر دی۔
شریف خاندان کی ملکیتی رمضان شوگر ملز کو عدالتی حکم کے باوجود این او سی جاری نہ کرنے کے خلاف درخواست پر سماعت ہوئی، عدالت نے ڈی جی ایکسائز اینڈ ٹیکسیشن کو کل ذاتی حیثیت میں طلب کر لیا۔
وکیل درخواست گزار کا کہنا تھا کہ درخواست گزار رمضان شوگر ملز نے این او سی کے حصول کیلئے تمام شرائط پورا کی، سیاسی بنیادوں پر این او سی جاری نہیں کیا جا رہا ۔رمضان شوگر ملز ایس ای سی پی میں رجسٹرڈ ہے اور تمام قوانین کو پورا کررہی ہے۔
جسٹس شاہد کریم نے رمضان شوگر ملز کی درخواست پر سماعت کی، عدالت نے کہا پہلے محکمہ ایکسائز کا موقف سن لیں پھر حکم جاری کریں گے، آپ نے توہین عدالت کی درخواست دائر کیوں نہیں کی۔
سرکاری وکیل نے عدالت سے استدعا کی کہ مرکزی کیس میں ابھی جواب داخل کرانا ہے اس کا انتظار کرلیا جائے، عدالت نے ریمارکس دئیے کہ دیگر ممالک میں جان بوجھ کر تاخیر کرنے پر نقصان کا معاوضہ دیا جاتا ہے۔
بعدازاں لاہور ہائیکورٹ نے رمضان شوگر ملز چلانے کیلئے فوری حکم جاری کرنے کی استدعا مسترد کر دی۔
