اسلام آباد: (دنیا نیوز) اسلام آباد ہائیکورٹ نے شیخ رشید کو آبپارہ پولیس کی طرف سے جاری طلبی کے نوٹس کو معطل قرار دے دیا۔
اسلام آباد ہائیکورٹ کے جسٹس طارق محمود جہانگیری نے شیخ رشید کے وکیل کے دلائل سننے کے بعد فیصلہ سنایا اور کیس کی سماعت پیر تک کیلئے ملتوی کر دی۔
عدالت نے اسلام آباد پولیس کو نوٹس جاری کرتے ہوئے حکم دیا کہ آئی جی سینئر افسر کو ڈپیوٹ کریں جو ریکارڈ کیساتھ پیش ہو۔
دوسری جانب سربراہ عوامی مسلم لیگ شیخ رشید نے عدالت کے باہر میڈیا سے گفتگو کرتے ہوئے کہا کہ آبپارہ پولیس کے نوٹس کو معطل کر دیا گیا ہے، عدالت نے کہا ایسا کوئی نوٹس نہیں بنتا، جو دفعات لگائی گئی ہیں وہ غلط ہیں۔
شیخ رشید نے کہا کہ پیر والے دن آئی جی عدالت میں پیش ہوں گے، بہترین کیس لڑنے پر اپنے وکلا کا مشکور ہوں۔
