مالاکنڈ، پشاور: (دنیا نیوز) خیبر پختونخوا میں پاکستان تحریک انصاف کی جیل بھرو تحریک کارکنوں کی عدم دلچسپی کے باعث ناکامی سے دو چار ہو گئی۔
ضلع مالاکنڈ میں کسی رہنما یا کارکن نے کوئی گرفتاری نہیں دی، سابق صوبائی وزیر شکیل خان، سابق ایم پی اے پیر مصور نے بھی گرفتاری نہیں دی، پی ٹی آئی ذرائع کے مطابق گرفتاری دینے کیلئے کل بٹ خیلہ میں کیمپ لگایا جائے گا۔
— PTI (@PTIofficial) February 23, 2023
پی ٹی آئی پشاور ریجن کے صدر محمد عاطف خان نے کہا ہے کہ پشاور میں تحریک انصاف جیل بھرو تحریک کو فی الحال موخر کر دیا گیا ہے، جیل بھرو تحریک میں پی ٹی آئی کا کوئی قائد، رہنما اور ورکر گرفتار نہیں ہو سکا۔
عاطف خان نے کہا کہ پی ٹی آئی کے کارکن اور قائدین گرفتاری پیش کرنے کے لیے موجود تھے مگر گرفتار نہیں کئے گئے۔
سابق سپیکر قومی اسمبلی اسد قیصر نے میڈیا سے گفتگو کرتے ہوئے کہا کہ ہم یہاں موجود ہیں اور کہا بھی ہے کہ گرفتاری دینا چاہتے ہیں لیکن پولیس گرفتار نہیں کر رہی، ابھی عمران خان سے رابطہ کریں گے کہ آگے کیا کرنا ہے۔
— Taimur Khan Jhagra (@Jhagra) February 23, 2023
اسد قیصر نے کہا کہ ہمارا مقصد دنیا کو بتانا ہے کہ پاکستان میں کوئی قانون نہیں، اس وقت عوام کو نکلنا ہو گا، ہمیں پاکستان کو قائد اعظم کا پاکستان بنانا ہو گا، ہمارے لوگ گاڑیوں میں بیٹھ گئے ہیں لیکن پولیس گرفتار نہیں کر رہی۔
سابق وزیر اعلیٰ خیبر پختونخوا پرویز خٹک نے کہا کہ قائدین اور کارکنان جیل کے باہر موجود ہیں، قیدیوں کی گاڑیوں میں جیل نہیں جائیں گے، جیل کا مین دروازہ کھولا جاءئے، جب تک عمران خان نہ کہے یہاں بیٹھے رہیں گے۔
جیل بھرو تحریک کے حوالے سے ایس پی عبدالسلام خالد نے کہا کہ پی ٹی آئی رہنما اور کارکن قیدیوں کی وین پر چڑھ کر فوٹو سیشن کر کے اتر گئے، جیل وین میں صرف پھولوں کے ہار ہی پڑے نظر آئے۔
— Insaf Youth Wing Pakistan (@IYWPK_Official) February 23, 2023
انہوں نے بتایا کہ کسی کو گرفتار نہیں کیا گیا، پی ٹی آئی کارکنان گرفتاری پیش کئے بغیر واپس چلے گئے، اگر کوئی رضاکارانہ گرفتاری دے گا تو گرفتار کر لیا جائے گا، دفعہ 144 اور روڈ بند کرنے پر ایف آئی آر درج ہوں گی۔
ایس پی سٹی عبدالسلام نے کہا کہ پی ٹی آئی کے کچھ رہنماؤں اور کارکنوں نے قیدیوں کی وین کے ٹائر بھی پنچر کئے ہیں۔
باجوڑ میں پولیس وین پر گرفتاری پیش کرنے کے لئے اعلانات کیے گئے کہ جو کوئی بھی رضاکارانہ گرفتاری پیش کرنا چاہے تو وہ جیل وین میں آ جائے، جیل وین باجوڑ خالی گشت کرتی رہی مگر کوئی نہیں آیا۔
