ملتان: (دنیا نیوز) تحریک انصاف کے وائس چیئرمین شاہ محمود قریشی نے کہا ہے کہ 84 کابینہ، پی ایس ایل، غیر ملکی دوروں کیلئے پیسے موجود ہیں، الیکشن کیلئے پیسے نہ ہونے کا حکومت بہانہ بنا رہی ہے۔
ملتان میں میڈیا سے گفتگو کرتے ہوئے سابق وزیر خارجہ شاہ محمود قریشی نے کہا کہ پی ایس ایل کے میچز ہو سکتے ہیں پر الیکشن نہیں، الیکشن کمیشن سے بات کرنے کا فیصلہ کیا ہے، چیف الیکشن کمشنر کو کہوں گا آئین نے شفاف الیکشن کی ذمہ داری دی ہے، انہیں کہیں گے آئیں مل بیٹھ کر ایسے الیکشن کرائیں جس پر انگلی نہ اٹھے۔
یہ بھی پڑھیں: چودھری پرویز الہٰی کو تحریک انصاف کا صدر بنا دیا گیا، نوٹیفکیشن جاری
تحریک انصاف کے مرکزی رہنما شاہ محمود قریشی نے مزید کہا کہ نگران وزیر اعلیٰ پی ڈی ایم کی ایکسٹینشن ہیں، گیلپ سروے کو پڑھ لیں یہ لوگ کہاں کھڑے ہیں، جیل بھرو تحریک کا مقصد انتخابات کا حصول تھا، انتخابات کا اعلان ہو گیا ہے، چودھری پرویز الہیٰ نے مشکل وقت میں ساتھ دیا، ان کو تحریک انصاف میں خوش آمدید کہتے ہیں۔
