گلگت: (دنیا نیوز) نگران وزیر اعظم انوار الحق کاکڑ نے گلگت میں مواصلاتی نظام کی تعمیر نو اور بہتری کے لیے حکمت عملی تشکیل دینے کی ہدایت کر دی۔
نگران وزیر اعظم انوار الحق کاکڑ نے وادیِ ہنزہ کا دورہ کیا، وزیراعظم کی ہنزہ کی سیاسی اور سماجی شخصیات سے ملاقات ہوئی، وزیر اعظم نے قراقرم ایریا ڈویلپمنٹ آرگنائزیشن کے منصوبے ہنر کھن کا دورہ بھی کیا۔
یہ بھی پڑھیں: کسی کو معاشرے کو یرغمال بنانے کی اجازت نہیں دیں گے: نگران وزیر اعظم
ہنزہ کی سیاسی قیادت اور عمائدین نے ہنزہ میں بجلی کی طلب و رسد، آبادی کے تناسب سے اسمبلی میں اضافی نشستوں کی فراہمی اور دیگر معاملات سے آگاہ کیا، وزیراعظم نے وفد کو گلگت بلتستان میں بجلی کے مسائل کے جلد از جلد حل کی یقین دہانی کرائی۔
نگران وزیراعظم نے متعلقہ حکام کو گلگت بلتستان میں نجی شعبے کے ساتھ مل کر مقامی طور پر بجلی کی پیداوار کی حکمت عملی تشکیل دینے کی ہدایت کی، ملاقات میں گلگت بلتستان کی سیاسی قیادت نے وزیراعظم کو سیاحت کے شعبے کو درپیش مسائل کے حوالے سے آگاہ کیا۔
— Government of Pakistan (@GovtofPakistan) September 13, 2023
وفد نے وزیراعظم سے درخواست کی کہ گلگت بلتستان کے مختلف حصوں کوفضائی رابطوں کے ذریعے منسلک کیا جائے، وزیراعظم نے متعلقہ حکام کو گلگت میں مواصلاتی نظام کی تعمیر نو اور بہتری کے لئے حکمت عملی تشکیل دینے کی ہدایت جاری کی۔
وزیراعظم نے چیف سیکرٹری گلگت بلتستان کو ہدایت کی کہ نشاندہی کردہ تمام مسائل کو جلد از جلد حل کرنے کے لئے تمام وسائل کو بروئے کار لائیں، وزیر اعظم نے ہنزہ میں قراقرم ایریا ڈویلپمنٹ آرگنائزیشن کے منصوبے "ہنر کھن" میں ڈیجیٹل ہب اور خصوصی افراد کی بحالی کے سینٹر کا دورہ کیا۔
انوار الحق کاکڑ نے قراقرم ایریا ڈویلپمنٹ آرگنائزیشن کی مقامی آبادی کی فلاح و بہبود کے لیے خدمات کو سراہا، دورے میں وزیراعظم نے کاڈو ہنر کھن کے ہونہار فری لانسر طلباء و طالبات سے ملاقات کی۔
نگران وزیر اعظم انوار الحق کاکڑ نے کہا کہ گلگت بلتستان کے نوجوانوں میں ترقی کی راہ پر گامزن ہونے کے لیے کام کرنے کا جوش و ولولہ انتہائی خوش آئند ہے۔
