لاہور: (دنیا نیوز) پاکستان مسلم لیگ نے اتوار کے روز پریس کلب لاہور کے سامنے اسرائیلی بربریت کے خلاف احتجاج کا اعلان کر دیا۔
چیف آرگنائزر پاکستان مسلم لیگ و سابق گورنر پنجاب چودھری سرور نے عوام کے نام پیغام میں کہا کہ قبلہ اوّل کی آزادی کیلئے فلسطینی عوام کے شانہ بشانہ کھڑے ہوں، جو اسرائیلی ظلم کے خلاف آواز اٹھانا چاہتے ہیں وہ احتجاج میں ضرور آئیں۔
چودھری سرور نے کہا کہ فلسطین کے نہتے بچوں اور خواتین کے خلاف اسرائیلی حکومت ظلم و بربریت کر رہی ہے، فلسطین کے مظلوموں کیلئے ادویات کی فراہمی اور پانی تک بند کر دیا گیا ہے، سکول اور کالجز پر اسرائیلی بمباری سے ہزاروں فلسطینی شہید ہوچکے ہیں۔
سابق گورنر نے کہا کہ اسرائیلی بربریت پر بین الاقوامی برادری کا ایکشن نہ لینا پوری انسانیت کیلئے لمحہ فکریہ ہے، بین الاقوامی برادری سے مطالبہ ہے کہ ظلم و بربریت کا خاتمہ ہونا چاہئے۔
چودھری سرور کا کہنا تھا کہ مظلوم فلسطینیوں کے حق میں دنیا بھر میں ہماری جدوجہد جاری رہے گی، یقین ہے کہ فلسطین آزاد ریاست بنے گا اور یروشلم اس کا دارالحکومت ہوگا۔
