کراچی: (دنیا نیوز) پیپلز پارٹی سندھ کے صدر اور سینیٹر نثار کھوڑو نے کہا ہے کہ نواز شریف کو پنجاب میں پذیرائی نہیں مل رہی جس وجہ سے وہ اتحاد بنا کر فیس سیونگ کر رہے ہیں۔
پریس کانفرنس کرتے ہوئے رہنما پیپلز پارٹی نثار کھوڑو نے کہا کہ پنجاب میں مسلم لیگ ن کی مقبولیت ختم ہوچکی ہے، ملک میں ایک بار پھر آئی جے آئی طرز پر اتحاد بنوانے کی کوشش کی جا رہی ہے، عوام کو حق حاکمیت سے دور رکھنے کیلئے مختلف جماعتوں سے لوگوں کو توڑ کر اتحاد بنایا جا رہا ہے۔
انہوں نے کہا کہ اگر نواز شریف کو آئی جے آئی طرز پر اتحاد کے ذریعے ملک پر مسلط کیا گیا تو سلیکٹڈ کہلائیں گے، پاکستان کو سلیکشن نہیں الیکشن چاہیے، سلیکشن کی سیاست پاکستان کو کمزور بنا دے گی۔
نثار کھوڑو کا کہنا تھا کہ ملک میں شفاف اور غیر جانبدار انتخابات کروائے جائیں، تمام جماعتوں کو لیول پلیئنگ فیلڈ فراہم کی جائے اورعوام ووٹ کیلئے با اختیارہوں، کسی بھی جماعت پر بندش عائد نہیں کی جائے، عوام جس جماعت کومینڈیٹ دیں اس جماعت کو حکومت بنانے کا حق حاصل ہو۔
رہنما پیپلز پارٹی نے کہا کہ پیپلزپارٹی اپنے پلیٹ فارم پر انتخابات میں حصہ لے گی اور اتحادوں کا مقابلہ کرے گی، پیپلز پارٹی نے ایم کیو ایم سے کبھی الیکشن کا اتحاد نہیں کیا ہے تاہم الیکشن کے بعد مخلوط حکومت بنانے کیلئے حکومتی اتحاد ضرور کیے گئے۔
ان کا مزید کہنا تھا کہ سپریم کورٹ کے حکم کی وجہ سے الیکشن کمیشن نے 8 فروری کو انتخابات کی تاریخ کا اعلان کیا، ن لیگ کے ساتھ اتحاد کرنے والی جماعتیں 18ویں ترمیم کی منظوری میں ایک ساتھ تھیں، اب یہ جماعتیں 18ویں ترمیم کیخلاف بیانات دے رہی ہیں، نواز شریف نے اپنے دور حکومت میں سندھ سمیت تھر کو اگنور کیا۔
