اسلام آباد:(دنیا نیوز) مساجد میں اعلانات کے معاملہ پر وزرات انسانی حقوق کے خط پر ایس ایچ او کو چارج شیٹ کردیا گیا۔
ترجمان اسلام آباد پولیس کے مطابق ایس ایچ او سیکرٹریٹ اشفاق وڑائچ کے مساجد میں اعلانات کے معاملہ پر وزارت انسانی حقوق کے خط پر نوٹس لیا گیا ہے۔
ایس ایچ او سیکرٹریٹ کو نا مناسب الفاظ کے چناؤ پر چارج شیٹ کردیا گیا ہے اور محکمانہ انکوائری عمل میں لائی جارہی ہے ۔
خیال رہے اسلام آباد پولیس وزارت انسانی حقوق نے ایس ایچ او تھانہ سیکرٹریٹ کے خلاف کارروائی کے لئے آئی جی اسلام آباد کو خط لکھا تھا۔
واضح رہے اسلام آباد پولیس کے سٹیشن ہاؤس آفیسر (ایس ایچ او) اشفاق وڑائچ نے پتنگ بازی روکنے میں ناکامی پر اعلان کیا تھا کہ اگر کسی کا بچہ پتنگ بازی کرتا ہوا پکڑا گیا تو اس کے باپ پر پرچہ دوں گا اور روڈ کے درمیان اس کو جوتے ماروں گا اور وہ پتنگ باز کا گھر بھی گرا دیں گے۔
