کراچی: (دنیا نیوز) گورنر سندھ کامران خان ٹیسوری نے کہا کہ شہرمیں خونی ڈمپر بے لگام ہیں، شہر میں ٹریفک گردی ہو رہی ہے، ایسا نہ ہو کہ شہری ڈمپرز روکنے لگیں۔
پریس کانفرنس کرتے ہوئے گورنر سندھ کامران خان ٹیسوری نے کہا کہ آئی جی سندھ ڈمپرزکے معاملے پر سنجیدگی سے نوٹس لیں، حادثہ کرنے والے ڈمپر کو فوری آکشن کیا جائے، ڈمپرز کے مالکاں جاں بحق افراد کو معاوضہ ادا کریں۔
گورنر سندھ کا کہنا تھا کہ کراچی میں روزانہ شہری ڈمپرز سے ہلاک ہو رہے ہیں، محکمہ ٹرانسپورٹ اور آئی جی سندھ نوٹس لیں، مجبور نہ کریں، ایسانہ ہو صوبے کا آئینی سربراہ سب کچھ اپنے ہاتھ میں لے لے۔
انہوں نے کہا کہ رات 11 سے صبح 7 کے بعد کوئی ڈمپر شہر میں داخل نہیں ہو سکتا، یہ دوپہر کے وقت کیسے گھوم رہے ہوتے ہیں۔
کامران خان ٹیسوری نے کہا کہ ساکنان شہر قائد کے تحت 31 واں عالمی مشاعرہ ہونے جا رہا ہے، جو کئی برسوں سے ہر سال ہو رہا تھا، اختلافات پیدا ہوگئے، عالمی مشاعرہ 8 فروری کو ایکسپو سینٹر میں منعقد ہو گا۔
گورنر سندھ نے کہا کہ حاجی رفیق پردیسی کی انسانیت کی خدمت کسی سے چھپی ہوئی نہیں، اب ایک ہو کر شہر کی ادبی محافل جاری رکھیں گے، شہر کی رونقیں بحال رکھنے کے لیے ہرممکن اقدامات کریں گے۔
انہوں نے کہا کہ حاجی رفیق اور محمود صاحب کا رابطہ ہوا، دونوں ایک ہوئے، اب ایک مشاعرہ ہونے جا رہا ہے، حاجی رفیق صاحب حیثیت ہیں، سماجی کاموں میں بڑھ چڑھ کر حصہ لیتے ہیں۔
کامران ٹیسوری نے کہا کہ اس سال شہرکراچی میں کئی مشاعرے ہوئے، یہ سلسلہ جاری رہے گا، شہر کی رونقیں جاری رہیں گی، دونوں اب مل کر باہمی اتفاق سے کام کریں گے۔
