لاہور: (دنیا نیوز) فلسطینی عوام سے اظہار یکجہتی کے لیے جماعت اسلامی کی کال پر ملک بھر میں شٹر ڈاؤن ہڑتال کی جا رہی ہے جس کے تحت ملک کے مختلف شہروں میں تجارتی مراکز مکمل طور پر بند ہیں۔
لاہور میں بادامی باغ آٹو پارٹس مارکیٹ مکمل بند ہے جبکہ شہر کی تمام کار ڈیلرز مارکیٹیں بھی بند ہیں، اردو بازار، مال روڈ سمیت اندرون شہر اور دیگر مارکیٹوں میں بھی آج کاروبار بند رہے گا۔
جماعت اسلامی کی کال پر انارکلی اور ملحقہ مارکیٹیں بھی بند ہیں، شاہ عالم مارکیٹ، برانڈرتھ روڈ، ہال روڈ اور ملحقہ مارکیٹیں بھی بند رہیں گی، ریڈی میڈ گارمنٹس، سولر مارکیٹ بھی بند ہے جبکہ شہر کی مرکزی غلہ منڈی بھی مکمل بند طور پر ہے۔
ادھر پشاور میں قصہ خوانی، خیبر بازار، پیپل منڈی، صدر، ہشت نگری اور دیگر اہم کاروباری علاقوں میں دکانیں بند ہیں جبکہ تنظیم تاجران کے مطابق رامپورہ گیٹ میں احتجاجی کیمپ بھی لگایا جائے گا۔
راولپنڈی کے راجہ بازار، مری روڈ، صدر اور کمرشل مارکیٹ میں دکانیں بند ہیں جبکہ سڑکوں پر ٹریفک بھی نہ ہونے کے برابر ہے، ڈرگسٹ اینڈ کیمسٹ ایسوسی ایشن کی جانب سے بھی ہڑتال کی جا رہی ہے جس کے باعث بیشتر بازاروں میں میڈیکل سٹورز بھی بند ہیں۔
پاکپتن اور گردونواح میں تمام چھوٹے بڑے کاروباری مراکز بند ہیں۔
ملکہ کوہسار مری میں اہل غزہ سے یکجہتی کے لیے مکمل شٹر ڈاون ہڑتال ہے، جماعت اسلامی کی شٹر ڈاؤن ہڑتال کی کال پر تمام کاروباری مراکز بند ہیں، مال روڈ، کینٹ مارکیٹ، بھوربن مارکیٹ، علیوٹ اور پھگواڑی سمیت تمام بازار اور سڑکوں پر ٹرانسپورٹ بھی کم ہے۔
کوئٹہ میں بھی فلسطینیوں سے اظہار یکجہتی ہڑتال کی جا رہی ہے، شہر میں تمام اہم بازار اور کاروباری مراکز بند ہیں، مستونگ، قلات، خضدار اور پشین سمیت بلوچستان کے مختلف علاقوں میں شٹرڈاؤن ہڑتال کی جا رہی ہے۔
دوسری جانب کورنگی كراسنگ روڈ پر سیاسی جماعت کی جانب سے فلسطین کے حق میں دھرنا دیا جا رہا ہے جس کے باعث روڈ ٹریفک کے لیے بند ہے، مظاہرین کی جانب سے سڑکوں کو ٹائر جلا کر ٹریفک کے لیے بند کر دیا گیا ہے۔
ٹریفک پولیس کا کہنا ہے کہ دھرنے کے باعث روڈ بند ہونے کی وجہ سے ٹریفک کو گودام چورنگی اور ناصر جمپ سے چمڑا چورنگی بھیجا جا رہا ہے۔
امیر جماعت اسلامی پاکستان حافظ نعیم الرحمان نے کہا ہے کہ ملک گیر شٹر ڈاؤن ہڑتال اہل غزہ سے یکجہتی کا اظہار ہے، پاکستانی قوم فلسطینیوں کی نسل کشی برداشت نہیں کر سکتی۔
آل سٹی تاجر اتحاد کراچی کا ہڑتال سے لاتعلقی کا اعلان
دوسری جانب کراچی میں آل سٹی تاجر اتحاد نے جماعت اسلامی کی ہڑتال سے لاتعلقی کا اعلان کیا ہے۔
تاجر اتحاد کے رہنما شرجیل گوپلانی نے کہا ہے کہ کراچی ٹمبر مارکیٹ آج مکمل کھلی رہے گی، ہمارا جماعت اسلامی کی کال پر ہونے والی ہڑتال سے کوئی تعلق نہیں, ہم 7 اپریل کو پہلے ہی اپنا احتجاج ریکارڈ کروا چکے ہیں۔
تاجروں کا آئی جی سندھ کو خط
ادھر کراچی کے بعض تاجروں کی جانب سے جماعت اسلامی کے خلاف آئی جی سندھ کو خط بھی لکھا گیا ہے۔
جامع الائنس مارکیٹ ایسوسی ایشن کے چیئرمین شیخ محمد ارشاد نے خط میں الزام عائد کیا ہے کہ جماعت اسلامی کی جانب سے آج کی ہڑتال کے سلسلے میں انہیں دھمکی آمیز پیغامات موصول ہو رہے ہیں اور پولیس سے تحفظ فراہم کرنے کی اپیل کی گئی ہے۔
