ڈیرہ اسماعیل خان: (دنیا نیوز) خیبر پختونخوا کے شہر ڈیرہ اسماعیل میں تیز رفتار ڈمپر اور کار کے درمیان خوفناک ٹکر ہوگئی، حادثے میں ایک ہی خاندان کے 5 افراد جاں بحق ہوگئے۔
ریسکیو ذرائع کے مطابق افسوسناک ٹریفک حادثہ ڈیرہ اسماعیل خان میں ڈیرہ ژوب شاہراہ پر پیش آیا جہاں تیز رفتار ڈمپر اور کار کے درمیان تصادم ہوگیا، جس کے نتیجے میں کار میں سوار تمام 5 افراد جان کی بازی ہار گئے۔
جاں بحق افراد کی شناخت حاجی محبوب گل، حاصل شیخ، حاجی یار محمد اور نازو شیخ کے نام سے ہوئی جبکہ مرنے والوں میں حاجی محبوب گل کا نواسہ بھی شامل ہے۔
ریسکیو اہلکاروں نے فوری طور پر موقع پر پہنچ کر لاشوں کو اسپتال منتقل کیا، جاں بحق افراد کا تعلق ایک ہی خاندان سے بتایا جا رہا ہے۔
حادثے کی اطلاع ملتے ہی متعلقہ حکام اور پولیس موقع پر پہنچ گئی اور واقعے کی تحقیقات شروع کردی گئی ہیں جبکہ حادثے کی بنیادی وجہ ڈمپر کی تیز رفتاری بتائی جا رہی ہے تاہم مزید تحقیقات جاری ہیں۔
دوسری جانب وزیر اعلی خیبر پختونخوا علی امین کا گنڈاپور نے افسوس کا اظہار کرتے ہوئے ضلعی انتظامیہ کو زخمیوں کو بروقت طبی امداد کی فراہمی یقینی بنانے کی ہدایت کی ، انہوں نے کہا کہ سوگوار خاندان کے غم میں برابر کے شریک ہیں۔
