کوئٹہ: (دنیا نیوز) خضدار میں سکول بس پر دہشت گرد حملے میں زخمی ہونے والی ایک اور طالبہ شہید ہو گئی۔
ہسپتال انتظامیہ کے مطابق 12 سالہ زخمی طالبہ کو گزشتہ روز کوئٹہ منتقل کیا گیا تھا، دھماکے کے 35 زخمی زیرِ علاج ہیں جن میں سے 5 بچیوں کی حالت تشویشناک ہے۔
سکیورٹی ذرائع کے مطابق آٹھویں جماعت کی طالبہ سحر سلیم ہسپتال میں زیر علاج تھی مگر زخموں کی تاب نہ لاتے ہوئے خدا کے حضور پیش ہو گئی، بس پر حملے کے 36 زخمیوں کو کوئٹہ منتقل کیا گیا تھا۔
دوسری جانب خضدار میں بس پر دہشت گرد حملے کا مقدمہ سی ٹی ڈی تھانہ خضدار میں درج کرلیا گیا، مقدمہ پولیس کی مدعیت میں درج کیا گیا جس میں قتل، اقدام قتل اور انسداد دہشت گردی کی دفعات شامل کی گئی ہیں۔
گزشتہ روز خضدار میں بھارتی حمایت یافتہ دہشت گردوں نے ایک سکول بس کو نشانہ بنایا تھا جس میں 3 بچیوں سمیت پانچ افراد شہید ہوئے تھے، اب شہداء کی تعداد چھ ہو گئی ہے۔
