کراچی: (دنیا نیوز) پنجاب کالونی میں بجلی اور پانی کی عدم فراہمی کے خلاف مکینوں نے شدید احتجاج کرتے ہوئے دو سڑکیں بند کر دیں جس سے گاڑیوں کی لمبی قطاریں لگ گئی ہیں۔
کراچی کے قیوم آباد پل سے لے کر ڈیفنس موڑ تک گاڑیوں کی قطاریں لگی ہوئی ہیں، کورنگی سے صدر جانے والا روڈ مکمل طور پر جام ہوگیا، ڈیفنس موڑ سے پنجاب چورنگی جانے والی سڑک بھی مکمل طور پر بند ہے، دفاتر جانے والے شہریوں کو مشکلات کا سامنا کرنا پڑ رہا ہے جبکہ علاقہ مکین بجلی کی عدم فراہمی کے خلاف احتجاج کررہے ہیں۔
مظاہرین کے مطابق متعدد شکایات کے باوجود کے الیکٹرک انتظامیہ نے ان کی کوئی سنوائی نہیں کی، دادا بائی بلڈنگ میں واقع 80 فلیٹس کی بجلی جمعہ کی صبح 11 بجے سے بند ہے، جس کے باعث مکین شدید پریشانی کا شکار ہیں۔
مظاہرین نے بتایا کہ جمعہ کے روز کے الیکٹرک کی ٹیم نے پنجاب کالونی اور پی این ٹی کالونی میں کنڈا مافیا کے خلاف کارروائی کی، جس کے دوران پی این ٹی کالونی میں جھگڑے کے بعد دادا بائی بلڈنگ کی بجلی بھی منقطع کر دی گئی۔
مظاہرین کے مطابق کے الیکٹرک کا مؤقف ہے کہ جب تک جھگڑے میں ملوث افراد معافی نہیں مانگتے، بجلی بحال نہیں کی جائے گی۔
مکینوں کا کہنا تھا کہ مسئلہ کسی اور سے ہے لیکن سزا پوری عمارت کو دی جارہی ہے تاہم احتجاج کے باعث ہیوی ٹریفک سمیت گاڑیوں کی طویل قطاریں لگ گئیں۔
ٹریفک پولیس کے مطابق مظاہرے کے باعث گذری انڈر پاس سے ٹریفک کو متبادل راستہ فراہم کیا گیا جبکہ کورنگی سے آنے والی گاڑیوں کو خیابان جامی کی طرف موڑا گیا۔
