راولپنڈی: (دنیا نیوز) لاہور ہائیکورٹ راولپنڈی بنچ نے سابق وزیراعلیٰ پنجاب چودھری پرویز الہٰی کو بڑا ریلیف دیتے ہوئے احتساب عدالت کا فیصلہ معطل کر دیا۔
لاہور ہائی کورٹ راولپنڈی بنچ کے جسٹس شہرام سرور اور ساجد محمود سیٹھی پر مشتمل بنچ نے چودھری پرویز الہٰی کی رٹ پٹیشن پر نیب کو نوٹس جاری کرتے ہوئے احتساب عدالت کا فیصلہ معطل کر دیا اور انہیں نیب کورٹ میں حاضری سے استثنا دے دیا۔
پرویز الہٰی کی طرف سے سردار عبدالرازق خان ایڈووکیٹ اور عامر سعید راں ہائیکورٹ ڈویژن بنچ میں پیش ہوئے۔
دوران سماعت وکیل نے بتایا کہ چودھری پرویز الہٰی بزرگ سیاستدان ہیں اور خرابی صحت کی بنا پر لاہور میں زیرعلاج ہیں، وہ ہر تاریخ پر احتساب عدالت نہیں آسکتے، ٹرائل کورٹ نے ذاتی حاضری سے استثنا کی درخواست غیر قانونی طور پر خارج کی ہے۔
جسٹس شہرام سرور نے نیب پراسیکیوٹر کو طلب کر کے پوچھا کہ نیب کو پرویز الہٰی کی ذاتی حاضری سے استثنا پر کیا اعتراض ہے، جس پر بتایا گیا کہ چودھری پرویز الہٰی کی علالت ایسی نہیں ہے کہ انہیں استثنا دیا جائے۔
بعد ازاں عدالت نے ابتدائی سماعت کے بعد پرویز الہٰی کی رٹ پٹشن باقاعدہ سماعت کیلئے منظور کرتے ہوئے احتساب عدالت کا فیصلہ معطل کر دیا اور نیب کو تفصیلی بحث کیلئے نوٹس جاری کر دیا۔
