لاہور: (دنیا نیوز) پنجاب حکومت نے صوبے میں انسداد منشیات کے لیے پنجاب کاؤنٹر نارکوٹکس فورس کے قیام کی منظوری دیدی۔
پنجاب میں منشیات کیخلاف سخت قانون نافذ، نارکوٹکس ایکٹ 2025 کی اسمبلی سٹینڈنگ کمیٹی نے منظوری دیدی ہے۔
بل کے متن کے مطابق پنجاب کاؤنٹر نارکوٹکس فورس کی سربراہی ڈی جی رینک کے حاضر یا ریٹائرڈ فوجی افسر کو سونپی گئی ہے، نارکوٹکس فورس کو پولیس جیسی مکمل تفتیشی اور گرفتاری کی طاقت حاصل ہوگی۔
نئی فورس تعلیمی اداروں کے آس پاس منشیات کی روک تھام کے لیے خصوصی اقدامات کرے گی، منشیات کیسز میں پنجاب فارنزک ایجنسی کی رپورٹ عدالت میں قابل قبول شہادت ہوگی، حکومت کو کسی بھی وقت شیڈول میں منشیات کی فہرست میں ترمیم کا اختیار حاصل ہوگا۔
منشیات سے متعلق اثاثے مشتبہ ہونے کی صورت میں ضبط کیے جا سکیں گے، نارکوٹکس کنٹرول سٹیشنز ہر ضلع و تحصیل میں قائم کیے جائیں گے جبکہ فورس کے افسران کو بغیر وارنٹ گرفتاری اور تلاشی کا اختیار حاصل ہوگا۔
منشیات کے خلاف کارروائیوں کے لیے خفیہ فنڈ قائم کیا جائے گا اور منشیات سے حاصل شدہ اثاثوں کو نیلام کر کے فنڈ میں شامل کیا جائے گا، اینٹی نارکوٹکس پالیسی کے مطابق صوبائی سطح پر ڈیٹا اور اعداد و شمار مرتب کیے جائیں گے۔
وفاقی اور دیگر صوبائی اداروں کے ساتھ معلومات کا تبادلہ لازمی قرار دیا گیا ہے، مشتبہ افراد یا اثاثوں کی شناخت میں معمولی غلطی ہونے پر نوٹس یا آرڈر کالعدم نہیں ہوگا، فورس کے اہلکاروں کے لیے خصوصی یونیفارم تجویز کیا گیا ہے۔
بل کے متن کے مطابق قانون پر عملدرآمد میں کی گئی نیک نیتی پر کوئی مقدمہ یا قانونی کارروائی نہیں ہوگی، حکومت کو قواعد و ضوابط بنانے، ترامیم کرنے اور مشکل کی صورت میں وضاحت کا مکمل اختیار ہوگا۔
سابق انسداد منشیات قوانین کے تحت کیے گئے تمام اقدامات نئے قانون کے تحت تصور ہوں گے، منشیات کے مقدمات میں غلط ایف آئی آر پر درج کرنے پر اہلکاروں کو سزا ہوگی، قانون میں شامل ادویات اور منشیات کی بین الاقوامی فہرست شامل کی گئی ہے۔
