لاہور: (دنیا نیوز) مون سون بارشوں اور گلیشیئر پگھلنے کے باعث دریاؤں میں پانی کے بہاؤ میں اضافہ ہونے لگا ہے۔
صوبائی ڈیزاسٹر مینجمنٹ اتھارٹی (پی ڈی ایم اے) کے مطابق دریائے سندھ میں تربیلا اور چشمہ کے مقام پر نچلے درجے کا سیلاب ہے، کالا باغ کے مقام پر درمیانے درجے کا سیلاب ریکارڈ کیا گیا ہے، جبکہ دریائے راوی، چناب، جہلم اور ستلج میں پانی کا بہاؤ نارمل سطح پر ہے۔
ترجمان کا کہنا ہے کہ ڈیرہ غازی خان رودکوہیوں میں پانی کا بہاؤ نارمل ہے، منگلا ڈیم میں پانی کی سطح 47 فیصد اور تربیلا میں 79 فیصد ہے، جبکہ ستلج ، بیاس اور راوی پر قائم بھارتی ڈیمز میں پانی کی سطح 36 فیصد ہے۔
ڈی جی پی ڈی ایم اے عرفان علی کاٹھیا نے متعلقہ اضلاع کی انتظامیہ کو الرٹ رہنے کی ہدایات جاری کرتے ہوئے کہا کہ شہری ہنگامی صورتحال میں ہیلپ لائن 1129 پر کال کریں۔
دوسری جانب پی ڈی ایم اے پنجاب نے مون سون بارشوں کے باعث نقصانات کی رپورٹ جاری کی جس میں بتایا گیا کہ رواں سال 103 شہری جاں بحق اور 393 زخمی ہوئے جبکہ بارشوں کے باعث 128 مکانات متاثر اور 6 مویشی ہلاک ہوئے۔
ترجمان کا کہنا تھا کہ گزشتہ 36 گھنٹے میں مون سون بارشوں کے باعث 63 شہری جاں بحق اور290 زخمی ہوئے، لاہور میں 15، فیصل آباد 9، ساہیوال 5، پاکپتن 3 اور اوکاڑہ میں 9 اموات رپورٹ ہوئیں۔
ڈی جی پی ڈی ایم اے کا کہنا تھا کہ وزیر اعلیٰ پنجاب مریم نواز کی ہدایات کے مطابق زخمیوں کو بہترین طبی امداد فراہم کی جا رہی ہے، پنجاب حکومت کی پالیسی کے تحت جاں بحق افراد کی فیملیز کوبھی امداد فراہم کی جائے گی۔
