پشاور: (دنیا نیوز) چیف جسٹس پشاور ہائیکورٹ نے گورنر خیبرپختونخوا فیصل کریم کنڈی کو مخصوص نشستوں پر منتخب ارکان سے حلف لینے کیلئے نامزد کر دیا۔
پشاور سے اہم پیشرفت سامنے آئی ہے، جہاں کل ہونے والے سینیٹ کے انتخابات پر غیر یقینی کے بادل چھٹنے لگے ہیں۔
اپوزیشن جماعتوں کی درخواست پر چیف جسٹس پشاور ہائیکورٹ جسٹس ایس ایم عتیق نے خیبرپختونخوا اسمبلی کی مخصوص نشستوں پر نامزد کئے گئے ارکان سے حلف لینے کیلئے گورنر کے پی فیصل کریم کنڈی کو نامزد کیا ہے۔
گورنر خیبرپختونخوا فیصل کریم کنڈی آج شام 6 بجے مخصوص نشستوں پر منتخب ارکان سے حلف لیں گے۔
خیال رہے کہ اپوزیشن نے مخصوص نشستوں پر حلف برداری کیلئے پشاور ہائیکورٹ میں درخواست دائر کی تھی، مخصوص نشستوں پر حلف برداری کیلئے درخواست رجسٹرار پشاور ہائیکورٹ کے پاس جمع کرائی گئی تھی۔
ایڈیشنل سیکرٹری جنرل پیپلز پارٹی خیبرپختونخوا ابرار سعید نے بتایا تھا کہ درخواست پیپلز پارٹی اور دیگر جماعتوں کی جانب سے دائر کی گئی ہے، جس میں موقف اختیار کیا گیا کہ مخصوص نشستوں پر کے پی اسمبلی میں منتخب اراکین سے حلف نہیں لیا گیا۔
درخواست میں استدعا کی گئی تھی کہ چیف جسٹس حلف برداری کیلئے کسی کو نامزد کریں۔
یہ خبر بھی پڑھیں: خیبرپختونخوا اسمبلی کا اجلاس کورم پورا نہ ہونے پر ملتوی، حلف برداری نہ ہو سکی
جس کے بعد چیف جسٹس پشاور ہائی کورٹ نے اپوزیشن کی درخواست پر مخصوص نشستوں پر اراکین کی حلف برداری کیلئے گورنر کے پی فیصل کریم کنڈی کو نامزد کر دیا ہے۔
علاوہ ازیں الیکشن کمیشن نے مخصوص نشستوں پر حلف برداری کیلئے چیف جسٹس پشاور ہائیکورٹ کو خط لکھ دیا اور درخواست کی کہ آرٹیکل 255 ٹو کے تحت حلف برداری کیلئے نمائندہ مقرر کریں۔
الیکشن کمیشن کے مطابق گورنر خیبر پختونخواہ بھی مخصوص نشستوں پر اراکین کیلئے خط لکھ چکے ہیں۔
قبل ازیں صوبائی اسمبلی کی مخصوص نشستوں کیلئے ہونے والا خیبرپختونخوا اسمبلی کا 2 گھنٹے سے زائد وقت کی تاخیر سے شروع ہونے والے اجلاس میں کورم کی نشاندہی کر دی گئی۔
خیبرپختونخوا اسمبلی کے اجلاس کی صدارت سپیکر بابر سلیم سواتی نے کی، اجلاس شروع ہوتے ہی حکومتی رکن شیر علی آفریدی نے کورم کی نشاندہی کر دی تھی، جس کے بعد خیبر پختونخوا اسمبلی کا اجلاس 24 جولائی دوپہر دو بجے تک ملتوی کر دیا گیا تھا۔
