راولپنڈی: (دنیا نیوز) راولپنڈی میں ایک گھر میں گیس لیکیج دھماکے سے آگ لگ گئی، جس میں 5 افراد زخمی ہو گئے۔
ریسکیو ذرائع کے مطابق راولپنڈی کے علاقے جھنڈا چیچی عزیز آباد میں ایک گھر میں گیس لیکیج کے باعث دھماکا ہوا جس کے نتیجے میں آگ لگ گئی اور 5 افراد شدید زخمی ہوگئے، زخمیوں کو انتہائی تشویشناک حالت میں قریبی ہسپتال منتقل کر دیا گیا، جہاں انہیں فوری طبی امداد دی جا رہی ہے۔
دھماکے سے متاثرہ گھر کی دیوار بھی منہدم ہوگئی، جس سے علاقے میں خوف و ہراس پھیل گیا۔
واقعے کی اطلاع ملتے ہی ریسکیو ٹیمیں اور محکمہ گیس کا عملہ موقع پر پہنچ گیا اور امدادی کارروائیاں شروع کر دیں۔
