اسلام آباد: (دنیا نیوز) وزیراعظم کی قیادت میں وزیر صحت مصطفیٰ کمال کی ہدایت پر ڈریپ نے انقلابی اقدام اٹھا لیا، میڈیکل ڈیوائسز کو ڈیجیٹائز کیا جارہا ہے۔
وزارت صحت کے جاری اعلامیہ کے مطابق وزیراعظم آج میڈیکل ڈیوائسز کی ڈیجیٹایزیشن کا افتتاح کریں گے، ویل چیئر سے لیکر ایم آر آئی مشین تک کی رجسٹریشن اور لائسنسنگ ان لائن ہو گی، میڈیکل ڈیوائسز کی رجسٹریشن اور لائسنسنگ کے حصول کیلئے گھر بیٹھے شہری آن لائن درخواست جمع کرواسکتے ہیں۔
جاری کردہ اعلامیہ کے مطابق اس اقدام سے اب سالوں کا عمل صرف بیس دنوں میں ہو گا، عوام کو بروقت معیاری، محفوظ اور مؤثر ادویات و میڈیکل ڈیوائسز میسر ہوں گی، پاکستان کا فارماسیوٹیکل اور میڈیکل ڈیوائسز کا شعبہ بے پناہ معاشی صلاحیت رکھتا ہے۔
وزارت صحت کے جاری اعلامیہ میں کہا گیا کہ وزیر صحت مصطفیٰ کمال کی قیادت صحت کے شعبے میں اصلاحات کا عمل تیزی سے جاری ہے۔
