جہلم ویلی: (دنیا نیوز) جہلم ویلی میں خوف کی علامت بننے والا تیندوا مارا گیا۔
آزاد کشمیر کے ضلع جہلم ویلی کی لائن آف کنٹرول سے متصل علاقے پانڈو میں انسانی آبادی پر حملہ کرنے والے خونخوار تیندوے کو بالآخر ہلاک کردیا گیا۔
خونخوار تیندوے کی دہشت کے باعث علاقے میں شدید خوف و ہراس پھیل گیا تھا، 2 روز قبل تیندوا 8 سالہ بچی کو گھر کے صحن سے اٹھا کر لے گیا تھا، جس کی لاش بعد ازاں کھیتوں سے برآمد ہوئی تھی، گزشتہ روز بھی اسی علاقے میں تیندوے کے حملے سے 17 سالہ نوجوان مدثر علی زخمی ہوگیا تھا۔
تیندوے کی ہلاکت کی خبر جنگل کے کنارے واقع گاؤں ڈبراں سمیت پورے علاقے میں سکھ اور اطمینان کا باعث بنی، مقامی افراد نے پاک فوج کی بروقت اور مؤثر کارروائی پر شکریہ ادا کیا اور سکیورٹی اہلکاروں کو خراج تحسین پیش کیا۔
واضح رہے کہ یہ واقعہ ایل او سی کے قریبی علاقے پانڈو سیکٹر میں پیش آیا جہاں پاک فوج کی تعینات ٹیم نے تیندوے کی موجودگی کی اطلاع پر کارروائی کرتے ہوئے درست نشانے پر گولی چلا کر اسے ہلاک کیا۔
