ہری پور، قصور، کالا باغ: (دنیا نیوز) پاکستان کے مختلف دریاؤں میں سیلابی صورتحال سنگین رخ اختیار کر رہی ہے، ستلج اور جناح بیراج پر پانی کی سطح میں مسلسل اضافہ ہو رہا ہے جس کے پیش نظر انتظامیہ ہائی الرٹ ہے۔
ہری پور میں تربیلا ڈیم میں سیلابی ریلہ داخل ہوگیا، پانی کی آمد 4 لاکھ 5 ہزار کیوسک جبکہ اخراج 3 لاکھ 70 ہزار 300 کیوسک ریکارڈ کیا گیا ہے، ڈیم میں پانی کی سطح 1547.96 فٹ تک پہنچ گئی ہے جبکہ فل لیول 1550 فٹ ہے۔
سپل ویز کھولنے کے بعد دریائے سندھ میں درمیانے درجے کا سیلاب پیدا ہوگیا ہے جس کے باعث تربیلا ٹی فائیو پراجیکٹ پر کام بند کر دیا گیا ہے جبکہ ضلعی انتظامیہ نے شہریوں کو ندی نالوں اور دریاؤں کے قریب جانے سے گریز کی ہدایت کی ہے۔
ادھر قصور میں دریائے ستلج کے کنارے ولے والا گاؤں کا حفاظتی بند مختلف مقامات سے ٹوٹ گیا، پانی گاؤں کے راستوں اور کھیتوں میں داخل ہو گیا جس کے باعث مقامی افراد نقل مکانی پر مجبور ہیں، ہیڈ گنڈا سنگھ والا کے مقام پر پانی کی سطح 19.30 فٹ جبکہ بہاؤ 66 ہزار کیوسک ریکارڈ کیا گیا ہے۔
دوسری جانب کالاباغ میں جناح بیراج کے مقام پر بھی دریائے سندھ میں پانی کی سطح بڑھ رہی ہے اور درمیانے درجے کی سیلابی کیفیت ہے۔
فلڈ کنٹرول روم کے مطابق بیراج پر پانی کی آمد 3 لاکھ 99 ہزار 608 اور اخراج 3 لاکھ 91 ہزار 608 کیوسک ریکارڈ کیا گیا ہے، صورتحال پر کڑی نظر رکھی جا رہی ہے۔
