اسلام آباد: (دنیا نیوز) وزیراعظم شہباز شریف نے چیئرمین نیشنل ڈیزاسٹر مینجمنٹ اتھارٹی کو خیبرپختونخوا کے 9 متاثرہ اضلاع میں امدادی کارروائیاں تیز کرنے کی ہدایت کر دی۔
سماجی رابطے کے پلیٹ فارم ایکس پر وزیراعظم شہباز شریف نے کہا کہ خیبرپختونخوا اور شمالی پاکستان میں بادل پھٹنے اور اچانک سیلاب کی وجہ سے ہونے والی تباہی سے شدید غمزدہ ہیں۔
انہوں نے کہا کہ دکھ کی اس گھڑی میں اپنے بھائیوں اور بہنوں کے ساتھ یکجہتی کے لیے کھڑے ہیں، حکومت ریسکیو اور ریلیف آپریشن کے لیے تمام وسائل کو متحرک کر رہی ہے۔
وزیراعظم نے کہا کہ چیئرمین این ڈی ایم اے سے ملاقات میں ہدایت کی ہے کہ سوات، بونیر ، باجوڑ، تورغر، مانسہرہ ، شانگلہ اور بٹ گرام کے متاثرہ اضلاع میں امدادی کارروائیوں کو تیز کیا جائے، باجوڑ اور بٹ گرام پر فوری توجہ دی جائے۔
انہوں نے نے کہا کہ پھنسے ہوئے رہائشیوں کو فوری ریلیف فراہم کیا جارہا ہے، زخمیوں کو طبی امداد فراہم کی جارہی ہے اور سڑکوں کو صاف کرنے اور رابطہ بحال کرنے کے لیے بھاری مشینری تعینات کردی گئی ہے۔
تباہی 2005 کے زلزلے جیسی ہے: امیر مقام
وفاقی وزیر امور کشمیر و گلگت بلتستان، سیفران امیر مقام نے کہا ہے کہ خیبرپختونخوا میں بارشوں اور سیلاب سے بڑی تباہی ہوئی، ضرورت اس بات کی ہے بحیثیت قوم متحد ہوکر متاثرین کی مدد کریں۔
یہ خبر بھی پڑھیں: وزیراعظم کی جناح میڈیکل کمپلیکس کی ڈیجیٹائزیشن، اے آئی اطلاق کی ہدایت
انہوں نے کہا کہ خیبرپختونخوا میں بارشوں اور سیلاب سے حالیہ تباہی 2005 کے زلزلے اور 2010 کے سیلاب جیسی ہے۔
این ڈی ایم اے کی ٹیم پشاور پہنچ گئی
قدرتی آفات سے نمٹنے کے قومی ادارے نیشنل ڈیزاسٹر مینجمنٹ اتھارٹی کا کہنا ہے کہ وزیر اعظم کی ہدایت پر این ڈی ایم اے کی ٹیم امدادی کاموں کی نگرانی کے لیے پشاور پہنچ گئی ہے۔
متاثرہ علاقوں میں پی ڈی ایم اے سمیت فوج، ضلعی انتظامیہ، ریسکیو 1122 اور مقامی رضاکار امدادی کاروائیوں میں مصروف ہیں، این ڈی ایم اے خیبر پختونخوا کی صوبائی حکومت اور پی ڈی ایم اے کو مکمل معاونت فراہم کر ے گا، محکمہ صوبائی حکومت کو امدادی سامان فراہم کر رہا ہے اور این ڈی ایم اے تمام متعلقہ سول اور عسکری اداروں کے ساتھ مکمل رابطے میں ہے۔
این ڈی ایم اے کے بیان کے مطابق شمالی علاقہ جات میں ممکنہ بارشوں کی صورت میں لینڈ سلائیڈنگ کے واقعات میں مزید اضافے کا امکان ہے۔
محکمے نے لوگوں کو بارشوں اور سیلاب کے دوران محتاط رہیں اور حفاظتی اقدامات یقینی بنانے کی ہدایت کی اور سیاحوں سے کہا ہے کہ اگلے پانچ تا چھ روز تک شمالی علاقہ جات کا سفر کرنے سے گریز کریں۔
