پشاور: (دنیا نیوز) پی ڈی ایم اے نے خیبر پختونخوا میں بارش اور سیلاب سے ہونے والے نقصانات کی رپورٹ جاری کر دی۔
رپورٹ کے مطابق صوبہ میں ہونے والی بارشوں اور فلش فلڈ کے باعث مختلف حادثات میں اب تک 316 افراد جاں بحق اور 156 زخمی ہوئے۔
پی ڈی ایم اے کے مطابق جاں بحق افراد میں 266 مرد، 29 خواتین اور 21 بچے جبکہ زخمیوں میں 123 مرد، 23 خواتین اور 10 بچے شامل ہیں۔
رپورٹ میں بتایا گیا کہ بارشوں اور فلش فلڈ کے باعث مجموعی طور پر 159 گھر وں کو نقصان پہنچا، جس میں 97 گھروں کو جزوی اور 62 گھر مکمل منہدم ہوئے۔
پی ڈی ایم اے کے مطابق یہ حادثات صوبہ کے مختلف اضلاع سوات، بونیر ، باجوڑ، تورغر، مانسہرہ، شانگلہ اور بٹگرام میں پیش آئے۔
رپورٹ کے مطابق سیلاب سے زیادہ متاثرہ ضلع بونیر میں اب تک مجموعی طور پر 210 افراد جاں بحق ہوئے۔
پی ڈی ایم اے کا کہنا ہے کہ 17 سے 19 اگست کے دوران شدید بارشوں کا امکان ہے، 21 اگست تک وقفے وقفے سے بارشیں جاری رہنے کی توقع ہے۔
ترجمان کے مطابق پی ڈی ایم اے کا ایمرجنسی آپریشن سینٹر مکمل طور پر فعال ہے، عوام کسی بھی نا خوشگوار واقعے کی اطلاع ، موسمی صورتحال سے آگاہی اور معلومات کے لیے فری ہیلپ لائن 1700 پر رابطہ کریں۔
