لاہور: (دنیا نیوز) ٹرینوں کی ڈی ریلمنٹس کے پے درپے واقعات کے بعد وزیر ریلوے حنیف عباسی نے پاکستان ریلویز کے افسروں سے برہمی کا اظہار کیا۔
وزیر ریلوے محمد حنیف عباسی نے ریلوے ہیڈ کوارٹرز لاہور میں ہنگامی اجلاس کی صدارت کی، اس موقع پر انہیں ٹرین آپریشن کے سیفٹی اقدامات پر تفصیلی بریفنگ دی گئی۔
حنیف عباسی نے کہا کہ نا اہل اور ایئر کنڈیشنڈ کمروں تک محدود افسران کو محکمہ ریلوے میں رہنے کا کوئی حق نہیں، سیفٹی پر کوئی سمجھوتا نہیں کروں گا۔
وزیر ریلوے نے کہا کہ غفلت کرنے والوں کے خلاف میرا کُھلا اعلانِ جنگ ہے، وارننگ دیتا ہوں کہ سیفٹی معاملات کو بہتر بنا لیں یا ریٹائرمنٹ لے لیں۔
انہوں نے کہا کہ سسٹم سے ڈمی کوچز نکالیں، چاہے اس کیلئے کوئی ٹرین بند ہی کیوں نہ کرنی پڑے، ٹریک کی مسلسل ٹرالی انسپکشن کریں اور اسے آپریشن کیلئے محفوظ بنائیں۔
حنیف عباسی نے کہا کہ ویجی لینس کے شعبہ کو تمام ضروری سہولیات فراہم کی جائیں، ٹرین ڈرائیورز کے ہاتھ میں 1100 مسافروں کی جان ہے، انہیں ریفریشر کورس کروائیں۔
وزیر ریلوے نے کہا کہ لگیج اور بریک وین کے معاہدوں میں توسیع کی بجائے شفافیت کے ساتھ اوپن آکشن کریں۔
