راولپنڈی: (احمد بھٹی) انسداد دہشت گردی عدالت نے 26 نومبر احتجاج کیس میں پاکستان تحریک انصاف (پی ٹی آئی) کے مزید 4 کارکنوں کو قید کی سزا سنا دی۔
اے ٹی سی کے جج امجد علی شاہ نے26 نومبر احتجاج کیس کی سماعت کی، پراسیکیوٹر ظہیر شاہ اور ملزمان کے وکلا عدالت میں پیش ہوئے۔
عدالت نے تھانہ ہنجرا اٹک میں درج مقدمے میں 4 پی ٹی آئی کارکنان عامر خان، سردار خان، خان محمد اور جاوید اقبال کو 4، 4 ماہ قید کی سزا سنائی، عدالت نے جلاؤ گھیراؤ کی دفعات کے تحت مقدمے میں فیصلہ سنایا۔
ملزمان نے عدالت میں اقبال جرم کیا، ملزمان نے اپنی اعترافی بیان میں کہا کہ قیادت کے اکسانے پر پُرتشدد احتجاج میں شریک ہوئے، غریب مزدور انسان ہیں لہٰذا سزاؤں میں نظر ثانی کی جائے۔
واضح رہے کہ مئی میں اسلام آباد ہائیکورٹ نے 26 نومبر احتجاج کے دوران گرفتار پی ٹی آئی کے 86 کارکنان کو رہا کرنے کا حکم دیا تھا۔
اُس وقت کے قائم مقام چیف جسٹس سرفراز ڈوگر اور جسٹس محمد آصف نے پی ٹی آئی کارکنوں کی ضمانتیں منظور کیں، علی بخاری کی کارکنان کے ضمانتی مچلکے کم کرنے کی استدعا منظور کی، پی ٹی آئی کارکنوں کی ضمانتیں 10، 10 ہزارمچلکوں کے عوض منظور کی گئیں۔
فروری میں بھی اسلام آباد ہائیکورٹ نے 26 نومبر احتجاج کیس میں گرفتار تمام 120 کارکنوں کی ضمانتیں منظور کی تھیں، قائم مقام چیف جسٹس سرفرازڈوگر اور جسٹس محمد آصف نے ضمانتیں منظورکیں اور فوری رہا کرنے کا حکم دیا تھا۔
