کراچی: (دنیا نیوز) الیکشن کمیشن نے ڈی ایم او کے فیصلے کے خلاف میئر کراچی مرتضیٰ وہاب کی اپیل بحال کر دی۔
ممبر سندھ نثار درانی کی سربراہی میں 3 رکنی کمیشن نے ڈسٹرکٹ مانیٹرنگ آفیسر (ڈی ایم او) کے فیصلے کے خلاف میئر کراچی مرتضیٰ وہاب کی اپیل پر سماعت کی۔
سماعت کے دوران مرتضیٰ وہاب کے وکیل نے مؤقف اختیار کیا کہ ڈی ایم او نے ہمیں سنے بغیر فیصلہ دیا اور کوئی نوٹس بھی جاری نہیں کیا گیا، الزام یہ لگایا گیا کہ الیکشن مہم کے دوران انہوں نے پریس کانفرنس کی، جس کے بعد ہماری اپیل بھی مسترد کر دی گئی تھی، وکیل نے استدعا کی کہ ہماری اپیل بحال کی جائے۔
الیکشن کمیشن حکام نے بتایا کہ مرتضیٰ وہاب کی اپیل مقررہ وقت کے بعد دائر ہونے کی بنا پر مسترد کی گئی تھی۔
اس موقع پر ممبر پنجاب نے ریمارکس دیئے کہ کمیشن نے متعدد بار آپ کو طلب کیا لیکن آپ پیش نہیں ہوئے، جس پر وکیل نے جواب دیا کہ گزشتہ ہفتے کراچی میں شدید بارشوں کے باعث ہم پیش نہیں ہو سکے تھے۔
ممبر پنجاب نے کہا کہ بارش تو اب ہوئی ہے، کمیشن آپ کو ایک سال سے بلا رہا ہے، اگر اپیل بحال کی گئی تو دوبارہ آپ 6 ماہ کیلئے غائب نہ ہو جائیں۔
بعد ازاں الیکشن کمیشن نے مرتضیٰ وہاب کی اپیل بحال کرتے ہوئے کیس کی مزید سماعت 16 ستمبر تک ملتوی کر دی۔
