اسلام آباد: (دنیا نیوز) وزیراعظم شہباز شریف اور امیر قطر شیخ تمیم بن حمد الثانی کے درمیان ٹیلیفونک رابطہ ہوا۔
وزیراعظم آفس کے مطابق اسرائیلی بمباری کے نتیجے میں قیمتی جانوں کا ضیاع اور شہریوں کی املاک کو نقصان پہنچا، وزیراعظم نے دوحہ میں اسرائیلی بمباری کی شدید مذمت، قیمتی جانوں کے ضیاع پر افسوس کا اظہار کیا۔
وزیراعظم شہباز شریف نے امیر قطر، قطری شاہی خاندان اور قطری عوام کے ساتھ ہمدردی اور یکجہتی کا اظہار کیا اور کہا کہ اسرائیلی حملہ بزدلانہ اور قابلِ مذمت اقدام ہے۔
شہباز شریف نے کہا کہ اسرائیلی جارحیت قطر کی خودمختاری اور سالمیت کی کھلی خلاف ورزی ہے، اسرائیلی اقدامات خطے کے امن و استحکام کے لیے سنگین خطرہ ہیں۔
وزیراعظم نے دو ٹوک موقف اختیار کرتے ہوئے کہا کہ پاکستان قطر کے ساتھ چٹان کی طرح کھڑا ہے، امت مسلمہ کو اس نازک موقع پر متحد ہونے کی ضرورت ہے۔
امیر قطر نے پاکستان کی حمایت پر تشکر کا اظہار کیا، پاکستان اور قطر کے رہنماؤں نے علاقائی امن و سلامتی کے لیے رابطے میں رہنے پر اتفاق کیا۔
