اسلام آباد: (دنیا نیوز) سپریم کورٹ نے نور مقدم قتل کیس میں مرکزی مجرم ظاہر جعفر کی نظرِ ثانی درخواست پر سماعت تین ہفتوں کے لیے ملتوی کر دی۔
سپریم کورٹ کے تین رکنی بنچ نے جسٹس ہاشم کاکڑ کی سربراہی میں نور مقدم قتل کیس میں مرکزی مجرم ظاہر جعفر کی نظرِ ثانی درخواست پر سماعت کی، ظاہر جعفر کی جانب سے وکیل خواجہ حارث پیش ہوئے۔
دوران سماعت جسٹس ہاشم کاکڑ نے ریمارکس دیئے کہ پہلے اس کیس میں سلمان صفدر وکیل تھے، کیا نظرِ ثانی میں وکیل تبدیل ہو سکتا ہے؟
خواجہ حارث نے مؤقف اختیار کیا کہ قانون میں ترمیم ہو چکی ہے اور اب نظرِ ثانی میں وکیل کی تبدیلی ممکن ہے، اس پر جسٹس ہاشم کاکڑ نے استفسار کیا کہ قانون کسی شخص کے لیے تبدیل ہوا ہے یا اصولی طور پر؟
جسٹس ہاشم کاکڑ نے مزید کہا ہے کہ اس کیس کا فیصلہ انہوں نے خود لکھا ہے اور جسٹس علی باقر نجفی کا اضافی نوٹ ابھی آنا باقی ہے، ممکن ہے اس اضافی نوٹ سے فریقین کو کوئی فائدہ مل جائے۔
بعد ازاں سپریم کورٹ نے نور مقدم قتل کیس میں مرکزی مجرم ظاہر جعفر کی نظرِ ثانی درخواست پر سماعت ایڈیشنل نوٹ آنے تک سماعت ملتوی کر دی۔
