لاہور: (دنیا نیوز) پنجاب حکومت نے نواز شریف آئی ٹی سٹی میں امپیریل کالج لندن کا کیمپس بنانے کا اعلان کر دیا۔
وزیراعلیٰ پنجاب مریم نواز شریف کی زیر صدارت خصوصی اجلاس ہوا جس میں فیصلہ ہوا کہ نواز شریف آئی ٹی سٹی میں امپیریل کالج لندن کا کیمپس بنے گا، نومبر میں امپیریل کالج لندن کے مقامی کیمپس کا سنگ بنیاد رکھا جائے گا، امپیریل کالج کیمپس میں 300 بیڈ کا جدید ترین ہسپتال بھی بنایا جائے گا۔
وزیراعلیٰ مریم نواز شریف نے دریائے راوی پر روڈا پرائمری بند ممکنہ سیلاب سے پہلے مکمل کرنے کا ہدف دے دیا۔
خصوصی اجلاس میں سنٹرل بزنس ڈسٹرکٹ پراجیکٹ، راوی اربن ڈویلپمنٹ اتھارٹی اور نواز شریف آئی ٹی سٹی پر پیشرفت کا جائزہ لیا گیا، روڈا فیز ون کی تکمیل کے لئے دو سال کا ہدف مقرر کیا گیا۔
وزیراعلیٰ کو سی بی ڈی، روڈا اور این ایس آئی ٹی پر تفصیلی بریفنگ دی گئی اور بتایا گیا کہ روڈا بند بننے سے لاہور دریائے راوی کے سیلاب سے محفوظ ہوجائے گا، انٹرٹینمنٹ سٹی میں چین اور ترکیہ کی کمپنیوں نے دلچسپی کا اظہار کیا ہے، ڈی او ایف روبوٹک اور یو بینڈ نے پلیر تھیم پارک میں دلچسپی کا اظہار کیا ہے، انٹرٹینمنٹ سٹی میں 80 نشستوں پر مشتمل فلائنگ تھیٹر بھی بنایا جائے گا۔
برینفگ میں مزید بتایا گیا کہ سلیکون سٹی، یونیورسٹی بلاک، اے ایس ٹی آر اے بلاک اور فلم سٹی میں مختلف اداروں نے دلچسپی کا اظہار کیا ہے، نواز شریف آئی ٹی سٹی میں آئی ٹی ٹاور کی تعمیر78 فیصد مکمل کر لی گئی، راوی سٹی پاکستان کا پہلا مکمل گرین سٹی ہوگا۔
وزیراعلیٰ مریم نواز شریف نے فیوچر پراجیکٹ کی جلد تکمیل کی ضرورت پر زور دیتے ہوئے فیوچر پراجیکٹ سے متعلق سہ ماہی رپورٹ پیش کرنے کی ہدایت کی اور وزیراعلیٰ نے روڈا کا قابل عمل بزنس پلان طلب بھی کر لیا۔
