بخارسٹ: (دنیا نیوز) پاک فوج کے شعبہ تعلقات عامہ کے مطابق پاک فضائیہ کے سربراہ ایئر چیف مارشل ظہیر احمد بابر سدھو نے حال ہی میں رومانیہ کا سرکاری دورہ کیا جس کے دوران دو طرفہ دفاعی تعاون پر بات چیت ہوئی۔
آئی ایس پی آر کے مطابق دورے کے دوران ایئر چیف نے رومانیہ کی فضائیہ کے سربراہ لیفٹیننٹ جنرل لیونارڈ گیبریل بارابوئی سے ملاقات کی۔
اس ملاقات میں دونوں ممالک کے درمیان دفاعی تعلقات کو مزید مستحکم بنانے اور فضائی افواج کے درمیان نئے تعاون کے امکانات پر تبادلہ خیال کیا گیا۔
آئی ایس پی آر کے مطابق رومانیہ ایئر فورس ہیڈ کوارٹرز پہنچنے پر ایئر چیف کو چاق و چوبند دستے نے گارڈ آف آنر پیش کیا، جس کے بعد دونوں فضائی سربراہان کے درمیان تفصیلی ملاقات ہوئی۔
ملاقات میں مشترکہ فضائی مشقوں، تربیتی تبادلوں اور فضائی و زمینی عملے کی صلاحیت بڑھانے پر غور کیا گیا۔
دونوں رہنماؤں نے علاقائی سلامتی کی صورتحال پر تبادلہ خیال کرتے ہوئے عالمی و علاقائی استحکام کے لیے دوطرفہ تعاون کی اہمیت پر بھی اتفاق کیا۔
پاک فوج کے شعبہ تعلقات عامہ کے مطابق رومانیہ کے فضائی سربراہ نے بھارتی جارحیت کے خلاف پاک فضائیہ کی پیشہ ورانہ کامیابیوں کی تعریف کی۔
آئی ایس پی آر کے مطابق لیفٹیننٹ جنرل بارابوئی نے پاک فضائیہ کی مقامی تیاریوں میں پیشرفت پر خراجِ تحسین پیش کیا۔
پاک فوج کے شعبہ تعلقات عامہ کے مطابق دونوں ممالک نے مشترکہ فضائی دفاعی چیلنجز سے نمٹنے کے لیے مضبوط ادارہ جاتی تعاون کے قیام پر اتفاق کیا۔
آئی ایس پی آر کے مطابق دونوں ممالک کے ایئر چیفس نے فضائیہ سے فضائیہ کے درمیان تعاون کو وسعت دینے پر بھی تبادلہ خیال کیا۔
جدید ہوا بازی ٹیکنالوجی میں دفاعی صنعتی شراکت داری بڑھانے پر بھی تبادلہ خیال کیا گیا، ایئر چیف کا یہ دورہ دونوں ممالک کے فوجی تعلقات میں ایک اہم سنگ میل کی حیثیت رکھتا ہے۔
