لاہور: (دنیا نیوز) ملک بھر میں یوم فضائیہ آج ملی جوش و جذبے سے منایا جا رہا ہے، آج ہی کے دن 1965 میں ایم ایم عالم نے وہ کارنامہ انجام دیا تھا جسے رہتی دنیا تک فضائی جنگوں کی تاریخ میں یاد رکھا جائے گا۔
7 ستمبر 1965 کو پاک فضائیہ کے شاہینوں نے دشمن کے عزائم کو ناکام بنا کر تاریخ رقم کی اور حریف ملک کی فضائیہ پر ہمیشہ کے لیے برتری پا لی جس کا مظاہرہ امسال مئی کی لڑائی میں بھی کیا گیا جب پاک فضائیہ کے شاہینوں نے دشمن طیاروں کو مار گرایا جس کی تصدیق ٹرمپ نے بھی کی۔
7 ستمبر 1965 کے یادگار دن کی مناسبت سے آج ملک بھر میں یومِ فضائیہ منایا جا رہا ہے، قوم اپنے بہادر جوانوں کی قربانیوں اور کامیابیوں پر فخر کرتی ہے۔
1965 ء کی جنگ میں سکواڈرن لیڈر ایم ایم عالم نے ایسا کارنامہ انجام دیا جو آج بھی دنیا کی عسکری تاریخ میں مثال ہے، انہوں نے ایک منٹ سے بھی کم وقت میں دشمن بھارت کے 5 جنگی طیارے مار گرائے، یہ کارنامہ آج بھی فضائیہ کی تاریخ کا ناقابلِ فراموش باب سمجھا جاتا ہے۔
یہ خبر بھی پڑھیں: پاکستانی فضائیہ نے معرکہ حق میں اپنے کردار سے دنیا کو حیران کر دیا: صدر و وزیراعظم
1965 ء کی جنگ کے دوران پاک فضائیہ کے جوانوں نے جرات اور مہارت کے ساتھ دشمن کے ناپاک عزائم کو خاک میں ملایا، پاک فضائیہ کے شاہینوں کی جانبازی نے پاکستان کو میدانِ جنگ میں برتری دلائی اور قوم کو سربلند کیا۔
وزیراعظم شہباز شریف نے یومِ فضائیہ پر اپنے پیغام میں کہا کہ انہیں فخر ہے کہ پاک فضائیہ نے فضائی جنگی معرکوں میں اپنی دھاک بٹھائی، اس کی کثیر الجہتی صلاحیتیں اور جدت ناقابلِ تسخیر ہیں اور پاک فضائیہ نے یہ ثابت کیا ہے کہ دشمن کبھی جذبے کو شکست نہیں دے سکتا۔
انہوں نے مزید کہا کہ معرکہ حق و باطل میں فضائیہ نے فیصلہ کن کردار ادا کرکے دنیا کو حیران کر دیا۔
نشان حیدر راشد منہاس کے مزار پر گل پاشی
یومِ فضائیہ کے موقع پر آج قوم اپنے شہداء کو بھی یاد کر رہی ہے، جن میں نشانِ حیدر پانے والے پائلٹ آفیسر راشد منہاس کو خصوصی طور پر خراجِ عقیدت پیش کیا جا رہا ہے۔
نشان حیدر راشد منہاس کے مزار پر پھول رکھنے کی تقریب ہوئی، فاتحہ خوانی کی گئی اور نوجوان پائلٹ کو ملک کی خاطر جان قربان کرنے پر خراج عقیدت پیش کیا گیا۔
