لاہور (محمد اشفاق) لاہور ہائیکورٹ نے آوارہ کتوں کے شہریوں کو کاٹنے کے بڑھتے واقعات پر متعلقہ محکموں سے رپورٹس طلب کر لیں۔
آوارہ کتوں سے متاثرہ افراد کے علاج معالجہ کے لیے ویکسین فراہم نہ کرنے کے خلاف کیس کی سماعت کے دوران ایڈیشنل میڈیکل سپرنٹنڈنٹ میو ہسپتال کی جانب سے رپورٹ جمع کروا دی گئی۔
رپورٹ میں کہا گیا کہ میو ہسپتال میں 14 ماہ کے دوران کتوں کے کاٹنے سے متاثر ہونے والے مریضوں میں اضافہ ہوا ہے ، میو ہسپتال میں 24 ستمبر 2024 سے اب تک 1796 مریض لائے گئے۔
جسٹس خالد اسحاق نے رپورٹ پر تشویش کا اظہار کیا اور کہا کہ جانوروں کے بھی حقوق ہیں لیکن اشرف المخلوقات کے بچوں کو سڑکوں پر کتے کاٹ رہے ہیں، متعلقہ محکمے رپورٹس جمع کرائیں۔
درخواست گزار کے وکیل اظہر صدیق ایڈووکیٹ نے کہاکہ آوارہ کتوں کے خلاف انتظامیہ کوئی ایکشن نہیں لے رہی، مختلف علاقوں میں بچے باہر نہیں نکل سکتے، خوف زدہ ہوچکے ہیں عدالت ذمہ داروں کے خلاف کارروائی کرے۔
عدالت نے حکم دیا کہ لائیو سٹاک، لوکل گورنمنٹ اور محکمہ صحت ایک اجلاس کریں، ہمیں چھ نکاتی ٹی او آرز فراہم کریں، متعلقہ محکمے آئندہ سماعت پر رپورٹس جمع کرائیں۔
