روم: (دنیا نیوز) کرسٹیانو رونالڈو کی ٹیم یووینٹس نے سیری اے کا آٹھواں ٹائٹل جیت لیا۔ سپر سٹار کھلاڑی آخری میچ میں گول نہ کر سکے۔ دباؤ کا شکار حریف کھلاڑی کا اون گول ہی فیصلہ کن ثابت ہوا۔
اطالوی فٹبال میدان پر اٹالین لیگ کے فیصلہ کن معرکہ میں کرسٹیانو رونالڈو کی ٹیم یووینٹس اور فیورینٹینا مدمقابل آئیں۔ فیورینٹینا نے میچ کا آغاز جارحانہ انداز میں کیا۔ چھٹے منٹ کی کامیابی سے سپر سٹار کی ٹیم کو للکار دیا۔
یووینٹس نے سینتیویں منٹ گول سے حریف کھلاڑیوں کی سبقت ختم کی اور برتری کی دھاک بٹھائی۔ دوسرے ہاف میں دباؤ کا شکار ٹیم کے کھلاڑی پیزیلا نے اون گول سے اپنی ہی ٹیم کو شکست کا شکار کر دیا۔
اسی دو ایک کے سکور پر میچ کا اختتام ہوا۔ گول نہ کر پانے والے کرسٹیانو رونالڈو کی ٹیم یووینٹس نے مسلسل آٹھویں بار سیری اے کا ٹائٹل اپنے نام کیا۔ بڑی جیت کی کھلاڑیوں نے بڑی خوشی منائی۔
